GELBBOLAŠVUOHTA: – Stáda mánáidviesus lea čielga rolla váldit vára rašimusain, ja sihkkarastit buot oasálaččaid riektesihkarvuođa, cealká Guovdageainnu sátnejođiheaddji Johan Vasara. Danne son oaivvilda ahte lea dehálaš ahte Mánáidviesus lea sámi giella- ja kulturgelbbolašvuohta. Vuorkágovva: Nils Johan Vars

Háliida mánáid­viesu Guovda­geidnui

Guovdageainnu sátnejođiheaddji Johan Vasara mielas lea dehálaš ahte Finnmárkku mánáidviesus lea sámi giella- ja kulturgelbbolašvuohta. Son cealká ahte dat gelbbolašvuohta gávdno juo Guovdageainnu suohkanis, ja danne heivešii mánáidviesu ásahit dohko.

14:41 Njukčamánu 20. beaivi 2017
Ođastuvvon: 21.03.2017 - 10:58

Guovdageainnu sátnejođiheaddji Johan Vasara háliida mánáidviesu Guovdageidnui.

Justiisaministtar Per-Willy Amundsen dieđihii NRK Finnmárkui ahte Finnmárkui galgá mánáidviessu ásahuvvot.

 

Unnimusat ovttagielagat

Vasara čálii ministarii ákkastallama manne mánáidviessu galggašii Guovdageidnui.

– Stuora oassi Finnmárkku álbmogis leat sápmelaččat, ja sámegielat sápmelaččat. Dan oktavuođas háliidan muittuhit ahte unnimus mánát leat dávjá ovttagielagat, sámegielagat. Dat lea oahpes ášši, ja danne leat Guovdageainnu suohkanis bajásšaddanbálvalusat measta aivve guovttegielat fálaldagat. Finnmárkku politiijaguovlu bargá maid ovttas Guovdageainnu politiijakantuvrrain, sihkkarastit sámegielat politiijaresurssaid. Go mii gáibidit sámi giella- ja kulturipmárdusa, eat daga dan nannen dihte sámegiela, muhto go lea dárbbašlaš vai suohkan ja eará eiseválddit sáhttet čađahit barggu nu go lágas gáibiduvvo, čállá Johan Vasara.

 

Mánáidviessu

Stáhta mánáidviessu lea fálaldat mánáide ja nuoraide, geat soitet vásihan dahje oaidnán veahkaválddálašvuođa.

Gažadeamit áššiin mat leat váidojuvvon politiijaide, dáhpáhuvvet mánáidviesus.

Sii maiddái čađahit medisiinnalaš iskkademiid, jus balahit illasteami.

Fálaldat lea maiddái psyhkalaš doaimmashehttejuvvon rávisolbmuide.

Otná dilli lea ahte Finnmárkku mánát ja nuorat fertejit Romssa mánáidvissui vuolgit.

– Stáda mánáidviesus lea čielga rolla váldit vára rašimusain, ja sihkkarastit buot oasálaččaid riektesihkarvuođa. Vuohki movt sii vuostáváldojuvvojit mearrida loahppabohtosa. Dássážii leat dulkkat leamaš veahkkin dán barggus, muhto Guovdageainnu suohkana mánáidsuodjalus oaidná ahte dulkon ii álo doaimma nu go galggašii. Dulkon galggašii leat liigečoavddus, go sámegielat fágabargit eai leat olámuttos.

 

Oktiičaskit

Vasara evttoha oktiičaskit mánáidviesu ja NAV Sámi, mii lea plánejuvvon.

– Guovdageainnu suohkan lea gulahallame NAV Finnmárkkuin álggahit sierra NAV Sápmi. Dat galggašii koordineret NAV váldobargguid mat leat oaivvilduvvon sápmelaččaide. Go gávdno juo gelbbolašvuohta, livčče miellagiddevaš oaidnit movt sáhtášii oktiiheivehit daid bálvalusaid. Finnmárkku mánáidviessu oččošii sierra ovddasvástádusa čuovvolit sámi geavaheddjiid.

Fáddásánit
Ođđasat

På forsiden nå