Čájáhusgovva/ vuorkágovva: Alice Balto

Buollin tunealla siste

Gávvuonas buollái okta bargobiila tunealla huksenbargguid oktavuođas. Buot bargit besse dearvan olggos.

15:54 Njukčamánu 20. beaivi 2017

Politiijat dieđihedje váile diibmu golmma ahte okta bargobiila lei buollan tunealla siste Gávvuonas, Álttá suohkanis. Buot heahteveahkit manne báikái.

 

Diibmobeale maŋŋel dieđihit politiijat ahte Buollinčaskadeaddjit jáddadedje buollima ja leat álgán biggohit suova olggos tuneallas.

 

Politiijat operašuvdnaguovddážis Jan Olav Schølberg muitala lea álo duođalaš go ožžot dieđu tuneallabuollima birra, ja erenoamážit go olbmot leat vel siste.

– Buollinčaskadeaddjit jáddadedje buollima, ja ledje guhtta bargi siste bargame. Buot bargit geat ledje tunealla siste leat dearvan, muitala Shcølberg.

 

Son muitala politiijat ledje váile njealjis loahpaheame bargguideaset báikkis ja áigot dutkat fitnodaga vai ožžot čielgasa buollimii.

Fáddásánit
Ođđasat

På forsiden nå