22 JAGI: Nuorra musihkkár Marja Mortensson lea olu lávddiid alde čužžon, ja dál almmuha vuosttaš skearru. Preassagovva: Jørn Kristensen

Almmuha vuosttaš skearru

– Mearkkašehpet su, son lea gean birra buohkat hupmet go lea sámi artisttain sáhka, čállá buvttadeaddji preassadieđáhusas.

16:26 Njukčamánu 29. beaivi 2017
Ođastuvvon: 30.03.2017 - 11:16

Marja Mortensson almmuha vuosttaš skearru dán giđa, skearru namma lea ge «Aarehgïjre» dahje Árragiđđa.

Dan dieđiha buvttadeaddji Frode Fjellheim preassadieđáhusas.

Son lea rámis nuorra artisttain.

– Mearkkašehpet su, son lea gean birra buohkat hupmet go lea sámi artisttain sáhka, čállá buvttadeaddji preassadieđáhusas.

 

– Boahttevaš máilmminásti

Marja Mortensson lea 22 jagi boaris, son juoigá lullisámi ja upmitsámi málle, ja čállá teavsttaid lullisámegillii.

Son lea ieš komponeren eanas šuoŋaid skearrus.

Skearrus leat fárus olu musihkkarat, Snorre Bjerck, Danel Herskesdal, Ida Gormsen, Christo Stangness, Ole Tveit Hana ja Øystein Sandbukt.

– Dá lea almmuheapmi mii ovdanbuktá boahttevaš máilmminástti, geas boahtit olu gullat. Sus lea čáppa ja mihtilmas jietna, mii guoskkaha guldaleddjiid, rápmo buvttadeaddji.

Cuoŋománu 10. beaivvi almmuhuvvo skearru, sihke CD-hámis, ja neahtas.

Fáddásánit
Kultuvra

På forsiden nå