OĐĐA LÁIDESTEADDJI: Anna Lumikivi lea Unna Junná ođđa prográmmaláidesteaddji, ja son oidnogoahtá boahtte mánnodaga. Yle Sámi preassagovva

Unna Junná ođđa sáddenáiggit

Yle Sámi mánáid-tv sáddagis rivdet sáddenáiggit. Dán giđa Unna Junná tv-ráiddus besset mánát maid oahpásmuvvat ođđa prográmmaláidesteddjiin.

17:06 Guovvamánu 13. beaivi 2017

Unna Junná mánáid-tv sáddenáiggit rivdet. Dál sáddejuvvo prográmma Yle TV-2 kanálas diibmu 08.35, ja vuosttaš prográmma lea boahtte mánnodaga. Dan dieđiha Yle Sápmi preassadieđáhusas.

 

Ođđa prográmmaláidesteaddji

Unna Junnái álgá ođđa láidesteaddji, Anna Lumikivi.

Anna lea bargan sámemusihkain jo gitta mánnávuođa rájes. Son lea vázzán Sámi Oahpahusguovddáža ja lea bargame iežas mánáidmusihkkaskearruin.

Unna Junná oahpes prográmmajođiheaddjit leat Heli Huovinen, Irene Länsman ja Niki Rasmus.

 

Mánáid musihkka ja animašuvnnat

Unna Junnás oaidnit Ima mánážat-skearru musihkaid anáraš- ja nuortalašgillii. Lávlagat leat govviduvvon ja báddejuvvon Ima da Tiina päärnä ja Ima ja Heli pärnääh-konsearttas ođđajagimánu loahpas.

Giđa Unna Junná-prográmmain leat mielde maid Sámi Oahpahusguovddáža medialinjá animašuvnnat ja Unna Junná iežas Säppli-Säplig-Sáhpán.

 

Binnabánnaš

Maiddái NRK Sámi mánáid-tv ráidu Binnabánnaš oidnogoahtá. Binnabánnaš buđáldallá iežas skihpáriin Ujjujuin ja seammás oahpaha mánáide ođđa sániid ja doahpagiid. Binnabánnáža sáhttet čuovvut sihke unnit ja stuorát mánát.

 

Njukčamánu loahpas, Unna Junnás álgá ráidu, mas sierra guovlluid mánát čájehit iežaset gávttiid ja muitalit maid sii jurddašit.

Fáddásánit
Magasiidna

På forsiden nå