BUORET SKUVLAÁRGABEAIVI: Givssidanáittardeaddji bargun lea buoridit mánáid ja nuoraid skuvlaárgabeaivvi. Govven: Scanpix (čájáhusgovva)

Veahkkin servodaga hearkki­musaide

Tromssa fylkkasuohkan lea virgádan givssidanáittardeaddji.
– Dát lea lávki ovddasguvlui servodaga hearkkimusaid dáfus, lohká aitto virgáduvvon givssidanáittardeaddji Jon Halvdan Lenning.

13:27 Ođđajagimánu 20. beaivi 2017
Ođastuvvon: 20.01.2017 - 14:03

Jon Halvdan Lenning lea virgáduvvon givssidanáittardeaddjin.  Son lohká iežas álgit dán virgái go háliida bargat dan ala ahte eanet mánáin ja nuorain lea buorre skuvlaárgabeaivi.

– Dat lea guovddážis dán virggis. Olles mu bargokarrieara leat dat leamašan guovddážis mu bargguin, ja dál go sierra givssidanáittardeaddjivirggi leat ásahan, de lea dat mu mielas lávki ovddasguvlui servodaga hearkkimusaid dáfus, lohká Jon Halvdan Lenning fylkkasuohkana preassadieđáhusas.

 

Ilus go dakkár virgi lea sajis
– Hárdin ja givssideapmi čuohcá garrasit sidjiide geat vásihit dan, ja das sáhttet leat duođalaš váikkuhusat nuoraid psyhkalaš dearvvašvuhtii. Mun lean ilus go mii dál leat ožžon dákkár virggi. Olu suohkanat leat čájehan beroštumi dasa, ja šaddá gelddolaš oaidnit mo mii hábmet dán virggi ovttas Lenningain, lohká Tromssa fylkkaráđijođiheaddji  Cecilie Myrseth.

 

Bistevaš ortnegiin
Givssidanáittardeaddji virgi leat vuos golbma jagi prošeakta. Prošeaktaáigodagas galget čielggadit makkár rolla áittardeaddjis galgá leat ja makkár resurssadárbbut leat jus áiggi mielde galget leat bistevaš givssidanáittardeaddjivirggit buot vuođđo- ja joatkkaskuvllain Norggas. Virgi galgá ge hábmejuvvot ovttasráđiid suohkaniiguin.

 

Bealátkeahtes olmmoš
– Givssidanáittardeaddji galgá leat bealátkeahtes resurssaolmmoš gii galgá bargat dan ala ahte ohppiin ja  oahpahalliin lea buorre psykososiála oahppo- ja bargobiras. Givssidanáittardeaddji galgá gozihit ahte áššemeannudeapmi lea dohkálaš ja ohppiid vuoigatvuođat ollašuvvet, čilge fylkkaráđđi Myrseth preassadieđáhusas.
 

Olámuttos
Givssidanáittardeaddji galgá leat álkit olámuttos. Sihke oahppit, oahpahallit, váhnemat ja ovddasteaddjit galget álkit oažžut oktavuođa suinna jus dárbbašit ráđiid, doarjaga dahje neavvagiid. Givssidanáittardeaddji galgá maid bargat dan ala ahte áššit čovdojuvvojit vuolimus dásis skuvlavuogádagas. Seammás galgá son buktit cealkámušaid dehálaš áššiin mat gusket oahppobirrasii.

Fáddásánit
Ođđasat

På forsiden nå