OĐĐA GILVU: Kárášjoga muohtačorgenfitnodagat šaddet ođđasit gilvalit muohtačorgenšiehtadusa alde Kárášjoga gielddas. Dát guoská njárggaide, Anárjotgeidnui ja Valjotgeidnui. Čájáhusgovva: Nils Johan Vars

Lágidit ođđa fálaldat­gilvvu maŋŋil go moito­juvvo

Kárášjoga gielda fálai skábmamánus muohtačorgenšiehtadusa LP-entreprenør fitnodahkii. Máŋga fitnodaga moite dán, ja dál geassá gielda šiehtadusa golmma guovllu dáfus ja lágida ođđa fálaldatgilvvu.

12:06 Ođđajagimánu 11. beaivi 2017
Ođastuvvon: 11.01.2017 - 13:53

– Šaddá ođđa fálaldatgilvu, go dat ovddit gilvu moitojuvvui ja mii leat doahttalan osiid dain moaitagiin, čilge Helge Nystad, guhte lea Kárášjoga gieldda sadjásaš gielddahoavda.

Golbma fitnodaga Kárášjogas, mat earret eará fállet muohtačorgema, leat moaitán ovddit fálaldatgilvvu.

Skábmamánus šiehtadii Kárášjoga gielda LP-entreprenør fitnodagain muohtačorgema dáfus olles Kárášjogas, ja dál gesset golmma guovllu dáfus šiehtadusa ja bidjet ođđa gilvvu.

 

Golmmas váidalan

Golbma fitnodaga Kárášjogas, mat earret eará fállet muohtačorgema, leat moaitán ovddit fálaldatgilvvu. 

Ávvir lea leamaš oktavuođas dán golmma fitnodaga jođiheddjiiguin, muhto ii oktage sis hálit kommenteret ášši aviissas.

Fitnodagat čállet moaitámušas earret eará ahte LP-entreprenør fálaldagas ii boađe ovdan lea go sis guorbmebiila mii deavdá 18 tonna gáibádusa, mii lei okta gilvvu eavttuin.

Dien oasi leage gielda vuhtii váldán, danne bidjet ođđa gilvvu.

 

– Lehpet go meaddán go attiidet fálaldaga dien fitnodahkii?

– Eat mii leat meaddán gal, muhto dás leat bealit mat sáhttet dulkojuvvot guovtte láhkai. Mii leat gulahallan maiddái gieldda juristtain, guhte maid rávvii ahte lea čorgadeamos jus dien golmma guovllu dáfus bidjat ođđa gilvvu, lohká Nystad.

 

– Ii oktage deavdán eavttuid

Eará sierra reivves muohtačorgenfitnodagaide, čállá gielda ahte heaittihit fálaldatgilvvu golmma muohtačorgenguovllu dáfus, ja bidjet johtui ođđa fálaldatgilvvu.

– Mii dieđihat ahte ollislaš árvvoštallama maŋŋel leat mearridan heaittihit osiid gilvvus, čállá gielda.

Sivvan dasa lea go fertejit hilgut buot fálaldagaid maid ledje ožžon dieid guovlluid ovddas, go ii oktage fitnodagain leat duođaštan ahte devdet rusttetgáibádusaid nu mo galget.

– Fitnodagaid fálaldagain ii boađe ovdan devdet go gáibádusa 18 tonna dáfus, mii mearkkaša ahte ii oktage fálaldagain deavdde gilvalanvuođu gáibádusa go guoská dieid guovlluide. Danne lea gielda geatnegahtton hilgut buot fálaldagaid, čállet sii.

(Ášši joatká gova vuolábealde)


KÁRÁŠJOGA SADJÁSAŠ GIELDDAHOAVDA: Helge Nystad
Vuorkágovva: Anne Rasmus

Heaittihan gilvvu

Ođđa fálaldatgilvu guoská rode 2 (Njárggat), rode 3 (Anárjotgeaidnu) ja rode 5 (Váljotgeaidnu) ovddas.

Rode 1 (Kárášjoga márkanguovddáš) ja Rode 4 (Čoavddatmohkki) ovddas bisuhit šiehtadusa nu mo dál lea.

– Mii leat šiehttan LP-entreprenør fitnodagain, ahte sii jotket čorgemis buot guovlluid dassái go ášši čielgá, lohká Nystad.

Vaikke bidjet dál ođđa gilvvu, de ii leat daddjon ahte dát fitnodat ii vuoitte fas gilvvu. Fitnodagat besset sáddet ođđa fálaldagaid maid gielda fas ođđasit árvvoštallá.

 

Lágidit ođđa

Daid eará guovlluid dáfus, de lea gielda árvvoštallan ahte dáid váidagiid eai doahttal. 

– Mii leat vástidan váidagiidda sierra reivviin, čállá gielda.

Nu álggahuvvo ođđa fálaldatgilvu nu jođánit go vejolaš.

– Mii giitit go lehpet searvan gilvui, ja sávvat buot fitnodagaid buktit fálaldagaid go ođđasit almmuhat gilvvu, čállá gielda.

Helge Nystad muitala gieldda válljen ahte Finnut Consult AS fitnodat galgá čađahit dan ođđa gilvvu sin ovddas.

– Leat sádden báhpiriid dál sidjiide ja sii de bargagohtet dáinna. Dán dálvvis gal jáhkkit geargat čielggadeames ášši, muhto balan ahte gollet ainjuo vihtta, guhtta vahkku ovdal go ordnašuvvá, lohká son.

 

Ávvir lea leamaš LP-entreprenør jođiheadji Lemet Ailu Boine ságain, muhto son ii háliidan kommenteret ášši.

 

 

Fáddásánit
Ođđasat

På forsiden nå