ÁLGGAHAN RUHTAČOAGGIMA: Sámi joatkkaskuvlla ja boazodoalloskuvlla boazodoallooahppit Inga Marja Lango ja Anne Madeleine Eira Hætta illudeaba vuolgit Troanddimii ávvudoaluide, muhto dan ovdal fertejit vuos čoaggit ruđa mátkái. Priváhta govva

Čogget ruđa vai besset Tråantii

Sámi joatkkaskuvlla ja boazodoalloskuvlla boazodoallooahppit leat álggahan ruhtačoaggima, go áigot vuolgit Tråante2017 doaluide.

11:12 Ođđajagimánu 19. beaivi 2017

– Min mielas orui hui dehálaš vuolgit dohko go lea 100-jagi ávvudeapmi ja dat dáhpáhuvvá dušše oktii. Dasa lassin lea doppe maid olu mii guoská boazodoallofágii, muitaleaba oahppit Anne Madeleine Eira Hætta ja Inga Marja Lango.

 

Fállet smávvabargguid

Danne ohce ge boazodoallooahppit hálddahusas lobi ja doarjaga vuolgit doaluide. Dan doarjaga gal ožžo, muhto eaktun lei ahte ieža maid mákset oasi mátkegoluin.

Danne leat ge álggahan ruhtačoaggima, Facebookas. Sii fállet smávvabargguid bargat, nu mo earret eará muoraid luoddut, muohttaga goaivut, mánnábiigán leat ja viesu bassat.

– Leat muhtimat váldán jo oktavuođa minguin, ja olusat háliidit ahte mii goaivut muohttaga sin ovddas. Lea hui somá, lohkaba nieiddaguovttes.

 

Sávvaba olu oahppat

Sii eai dieđe vuos man guhká besset leat Troanddimis ávvudoaluid oktavuođas, go dat lea gitta das man olu nagodit dinet.

Muhto nieiddaguovttes leat gal vuordámušat mátkái.

– Moai vurde ahte šaddá hui somá doppe ja ahte oahppat hui olu dán mátkkis, lohkaba soai.

 

– Buorre go nuorain lea servvodatberoštupmi

Sámi joatkkaskuvlla ja boazodoalloskuvlla rektor Ellen Inga O. Hætta lea hui movttet go nuorain lea beroštupmi ávvudoaluide:

– Dát lea dakkár mii dáhpáhuvvá dušše oktii, ja ferte 100 jagi vuordit ovdal go fas leat dákkár ávvudeamit, danne lea somá go nuorat beroštit servodagas ja háliidit dohko vuolgit, lohká rektor Ellen Inga O. Hætta.

– Sii jerre mis oččoše go sii vuolgit čuovvut dáid doaluid, ja ákkastalle ahte doppe leat hui olu doalut mat gusket boazodollui ja dieinna lágiin sidjiide livččii dás maiddái fágalaš ávki, čilge rektor.

Son muitala iežaset suovvan ohppiid vuolgit dainna eavttuin ahte ieža maid ruhtadit oasi mátkegoluin, danne leat ge oahppit álggahan ruhtačoaggima.

– Dat vuvdet earret eará muoraid ja joŋaid maid ieža leat čakčat čoaggán, dál aitto fitne dás oahppit geat skuvlii vuvde joŋaid. Lea maid hui buorre go nuorat besset oaidnit olu máksá mátkkoštit, muitala rektor.

 

– Galgá leat álgoálbmotperspektiiva skuvlaárgabeaivvis

Rektor mieđiha ahte livččii leamaš miella buot ohppiid váldit mielde, muhto dan ii leat vejolaš.

– Muhto mu mielas lea hui buorre go ohppiin lea dat servodatberoštupmi ahte ieža árvalit vuolgit dákkár doaluide ja maiddái ieža ákkastit manne galggašedje beassat, lohká son.

Dát skuvla leage áidna joatkkaskuvla mii lea dohkkehuvvon Winhec álgoálbmotskuvllaid fierpmádahkii. 

Danne oaivvilda ge rektor ahte dása gullá eambbo go dušše čáppa namma ja pláhkkát mii čájeha sii gullet dán fierpmádahkii.

– Mun jurddašin dalle jo go dohkkehuvvuimet dása, ahte das ferte maid sisdoallu de, mis ferte leat álgoálbmotperspektiiva skuvlla árgabeaivvis. Tråante doaluin lea maiddái álgoálbmotperspektiiva man birra oahppit galget oahppat, lohká son.

 

På forsiden nå