Birasdirektoráhtta válddii vuhtii FeFo cealkámuša rievssatbivddu áiggiid birra. Govva: FeFo

Rievssatbivdu ii rievdda

Finnmárkkuopmodat lea duhtavaš go Birasdirektoráhtta ii dattetge rievdat rievssatbivddu áiggiid.

15:57 Juovlamánu 14. beaivi 2016

Finnmárkkuopmodat (FeFo) lea ovttas Norgga bivdo- ja guolástanservviin, Statskogain, Fjellstyresambandet ásahusain ja Skogeierforbundet meahcceeaiggátservviin vuosttildan direktoráhta evttohusa loahpahit rievssatbivddu juovlamánu 23. beaivvi. Dan dieđiha FeFo preassadieđáhusas.

FeFo oaivvildii ahte evttohus ii lean fágalaččat ákkastallon ja iige váikkut movtge, go golbma proseantta bivddus dáhpáhuvvá ođđajagimánu 1.beaivvi rájes gitta bivdu loahpahuvvo njukčamánu 15.beaivvi.

– Mii leat hui duhtavaččat mearrádusain. Dat mearkkaša ahte Birasdirektoráhtta lea guldalan cealkámušaid maid lea ožžon, ja muitala man mávssolaš máhtolaš hálddašeapmi lea, dadjá meahccejođiheaddji Einar J. Abjørnsen.

 

Finnmárku lea juhkkon smávit bivdoguovlluide. Bivdokoarttaid doibmiibidjamiin oažžu FeFo dađistaga buotlágan dieđut nugo bivdodeattu ja bivddu birra.

Go lea dárbu, sáhttá FeFo giddet bivdoguovlluid eará guovllu bivdiide. FeFo meroštallet rievssatlogu iešguđet guovlluin ovdal go bivdu álgá. Sin váldoprinsihppa lea ahte Finnmárkku rievssatbivdu galgá leat ceavzil.

– Sivvan manne mis lea leamaš ná garra oaidnu juste dán áššis, lea ahte min bivdiid raporttat ja doibmiibidjamat addet hui buriid dieđuid mat duođaštit min. Mii fertet rápmot ealgabivdiid geat leat leamaš čeahpit doibmiibidjat bivdogoarttaideaset, ja mii oaidnit bohtosiid dán áššis, lohká Asbjørnsen.

 

Láhkanjuolggadus rievdaduvvo juohke viđát jagi. Bivdináiggit bissot nu go odne leat.

På forsiden nå