Sámedikki ráđđelahttu lea duhtavaš go ráđđehus áigu geahčadit dálá boraspireguovlluid hálddašeami. Vuorkágovva: Sara Maret Ravdna Oskal

Rađđehus mielas rievdadit boraspire­hálddašan­guovlluid

Sámediggeráđi lahttu Silje Karine Muotka lea duhtavaš go ráđđehus lea mielas geahčadit guovlluid gos galget ja eai galgga boraspiret.

14:29 Juovlamánu 02. beaivi 2016
Ođastuvvon: 02.12.2016 - 14:32

Dálkkádat- ja birasdepartemeantta ja Sámediggeráđi čoahkkimis ledje fáddán earret eará boraspirehálddašanguovllut. Sámedikki ráđđelahttu Silje Karine Muotka muitala sii válde Sámedikki bealis ovdan daid boraspire A- ja B-guovlluid.

– Mii válddiimet ovdan ahte dat dálá mearriduvvon guovlluin leat ollu hástalusat, eai ge dat doaimma. Danne leat evttohan ahte guovlluid galggašii rievdadit, lohká Muotka.

 

Boraspiriid guovlu

Dál leat guokte hálddašanguovllu boraspiriide, A- ja B-guovlu, guđe nai ráfáiduvvon boraspirii. A-guovllus galgá boaraspire hálddašuvvot nu ahte regionála nállemihttu olahuvvo ja doalahuvvo. Nállemihtu reguleren earrebivddu dahje liseanssabivddu bokte lea áigeguovdil A- guovllus jus nállemihttu lea duođaštuvvon. Ruhta eastadit ja riidoeastadandoaimmaide iešguđet boraspirešláddjái maid vuoruhuvvojit A- guovllus. A- guovllus ii leat nu álki oažžut báhčinlobi boraspiriide mat vahágahttet.

 

B- guovllus álkit oažžut báhčinlobi

B- guovllus eai galggaše leat boraspiret. Dál leat boraspiret guovllus, ja lea jáhkehahtti ahte boraspiret vánddardit A- guovllus B- guvlui. Boraspirelávdegoddi dáhttu atnit olámuttos gaskaomiid unnidit boraspiriid B- guovllus. Ruhta eastadit ja riidoeastadandoaimmaide iešguđet boraspirešláddjái eai vuoruhuvvo B- guovllus seamma ládje go A- guovllus. B- guovllus galgá čađahuvvot juohke jagi liseansabivdu. B- guovllus lea álkit oažžut báhčinlobi boraspiriide mat vahágahttet.

 


Govas čájeha dálá A- ja B- guovlluid geatkai. B- guovllus ii galggaše geatki gávdnot. Šearbmagovva: Rovviltportalen

 

 

 


Govas čájeha A- ja B- guovlluid albasii. Šearbmagovva: Rovviltportalen

 

 


Guovžža A- ja B guovllut. Šearbmagovva: Rovviltportalen

 

Bargu juo jođus

Politihkalaš ráđđeaddi Jens Frølich Holtelohká ráđđehussii lea hui dehálaš ahte leat čielga rájit mat sirrejit boraspiriid ja guohtunealáhusaid, nu movt boazodoalu.

– Mii leimmet bivdon dahkat árvvoštallama mii guoská regionála boraspirehálddašeapmái, mii lea boraspiresoahpamuša čuovvoleapmi. Norgga Luonddudutkaninstituhtta (NINA) lea čađahan dutkamuša, mas boahtá ovdan ahte boraspirelávdegottiin leat hástalusat go galget hálddašit boraspiriid. Earret eará sáhttet leat A- ja B- guovllut beare unnit hálddašit boraspiriid, daid rájit čuvvot fylkkarájiid mat eai vuhtii váldde boraspiriid, eaige guohtonealáhusaid. Boraspirelávdegottit eaige leat dagahan unnit riidodási berošteddjiid gaskka. Dutkamis boahtá ovdan ahte dehálaš mearrádusat galggaše našunála dásis dahkkot, muitala Frølich Holte.

 

 

Rievttes áigi

Ráđđehus leage juo bidjan johtui barggu geahčadit olles boraspirehálddašeami, ja dasa guoská A- ja B- guovlluid juohkin.

– Danne lea hui rievttes áigi Sámedikkis váldit daid ovdan, go leat juo bargame dainna. Dás ii leat gulaskuddanáigi ja čuovvovaš áiggi čađahit gulaskuddančoahkkimiid iešguđet berošteddjiiguin, ja Sámediggi lea ožžon sierra čoahkkimiid.

 


Birasministara politihkkalaš ráđđeaddi Jens Frølich Holte muitala ráđđehusas lea bargu jođus geahčadit boraspireguovlluid. Govven: Bjørn Stuedal

 

Duhtavaš

Sámediggi galgá ge ain gulahallat ráđđehusain dán proseassas. Silje Karine Muotka lea duhtavaš dainna. Son ii sáhte vuos lohkat movt galggašii A- ja B guovlluid juohkit.

– Mii fertet dál gulahallat boraspirelávdegottiiguin, Norgga Boazosápmelaččaid Riikkaservviin ja Boandaservviin iskan dihte movt galggaše guovllut sirrejuvvot, lohká son.

 

Eai sáhte hohpohallat

Politihkalaš ráđđeaddi Jens Frølich Holte ii loga dán barggu sáhttit nu jođánit gárvánit, go dás lea hui ollu maid ferte váldet vuhtii.

– Boraspirehálddašeapmi ja boraspirepolitihkka lea dakkár mas leat hui ollu berošteaddjit, ja mii fertet váldit áiggi gullat buot beliid das. Nu ahte mii eat sáhte hohpohallat áššiin, lohká son.

 

 

 

 

 

 

 

 

 

 

 

 

 

 

 

 

 

 

På forsiden nå