ČUOVUI IEŽAS DOVDDUID: Marit Karlsen (Bb) čuovui iežas dovdduid ja doarjjui Gurut- ja Olgešbellodaga evttohusa skuvlaáššis. Govven: Nils Johan Vars

Jienastii iežas bellodaga vuostá

Bargiidbellodaga áirras jienastii iežas bellodaga oainnu vuostá skuvlabeaivvi-áššis, go lei sáhka galgá go doalahuvvot njealje- vai viđabeaivásaši skuvlavahkku Guovdageainnu suohkana skuvllain.

13:20 Juovlamánu 15. beaivi 2016

Guovdageainnu suohkanstivrras lei garra ja maid dovdduide čuohcci digaštallan go meannudedje galgá go jotkojuvvot njealje- vai viđabeaivásaš skuvlavahkku.

 

Ii doarvái buorre

Bargiidbellodaga suohkanstivraáirras, Marit Karlsen, lohká čuohcat alcces go suohkanis eai oro váldime vuhtii movt mánáin lea oahppan go lea njeallje beaivvi skuvla vahkkus ovdalii vihtta beaivvi.

– Juo, dat čuohcá munnje, go mu mielas eai leat doarvái bures guorahallan movt čuohcá mánáid oahppamii go leat guhkes skuvlabeaivvit, maid njealjebeaivásaš skuvla vahkkus buktá, lohká son.

Karlsen evttohii maŋidit mearrádusa dahkat áššis, dassážii go lea guorahallon makkár váikkuhusat da leat mánáide.

 

Ii neutrála

– Áššemeannudeapmi ii leat leamaš neutrála, lea beare olu sáhka ruđas go movt mánáide čuohcá pedagogalaččat, logai Gurutbellodaga Ann Catharina Lango sárdnestuolus.

Su bellodat ja Olgešbellodat bukte oktasaš evttohusa ahte guhkidit skuvlavahkku, seammás go galget guorahallat váikkuhusaid maid njeallje beaivvi skuvla ovdalii go vihtta beaivvi skuvla sáhttá dagahit mánáid oahppamii.

Váhnen Ann Kristine Bongo logai ikte Ávviris iežas mielas áššečilgehusa leat nu ovttageardánin, ahte čuovgá čađa ahte lea suohkana hálddahus mii stivre movt politihkkarat galget meannudit.

 

«Google-olmmái»

Klemet Erland Hætta muitalii ahte son lea jearran iežas «olbmás», Googles, ja doppe leat dievva guorahallamat movt váikkuha man guhkes skuvlabeaivvit mánáin berrejit leat.

Hætta ii loga doallat deaivása ahte eai leat guorahallamat dan ektui, ja dajai son jienasta vuostá maŋideami man Bargiidbellodaga Marit Karlsen ovddidii.

 

Doarjjui unnitlogu

Marit Karlsena evttohus hilgojuvvui jienasteamis, ja dalle biddjui Guovdageainnu ovdagotti mearrádusevttohus, mii lei doalahit njealjebeaivásaš skuvlavahkku, ja Gurut- ja Olgešbellodaga oktasaš evttohus vuostálaga.

Dan áššis oaččui ovdagotti evttohus eanetlogu, muhto Marit Karlsen gal doarjjui unnitlogu dán áššis ja jienastii iežas bellodatustibiid vuostá.

På forsiden nå