Govven: Beaivváš Sámi Našunálateáhter

– Heitet nealgudeames sámi kultuvrra

Nu cealká Fágalihtu riikastivra ráđđehussii, go ii leat juolludan ruđa Beaivváš Sámi Našunálateáhterii ii dán jagi ge.

17:10 Juovlamánu 08. beaivi 2016

Fágalihtu riikastivra cealká ahte alit-alit ráđđehus joatká 2017 stáhtabušeahtas politihka geahpidit doarjaga sámi kultuvrii ja gillii.

– Guokte jagi maŋŋálaga lea ráđđehus ovdanbuktán bušeahta mas praktihkalaččat čuohppá doarjaga sámi doaimmaide, čállet sii preassadieđáhusas.

 

– Nealgudit

– Čuohppan juolludemiide Sámediggái, mearkkaša čuohppan sámi vuođđooahpahusas, čuohppan sámi oahpponeavvuin ja čuohppan kultuvrras ja ealáhusovdáneamis, oaivvilda Fágalihttu.

Ráđđehusa nealgudeapmi sámi kultuvrras mearkkaša ahte ii 2017:s ge biddjo ruhta álgoprošektii hukset ođđa teáhtervistti Beaivváš Sámi Našunálateáhterii.

 

– Teáhter lea dehálaš aktevra

Teáhtera visti lea nu heittot ahte Bargobearráigeahčču lea árvvoštallan giddema.

– Vaikko teáhter lea heajos dilis, de lea dáiddalaš kvalitehta allat, čállá Fágalihttu. 

Dán jagi lea teáhter vuoitán sihke Hedda-bálkkašumi ja Árvvoštallan-bálkkašumi «Vidas Extremasiin».

Teáhter lea internašunála mearkagálvu ja lea dehálaš aktevra našuvnnalaččat ja riikkaidgaskasaččat gaskkusteamis sámi kultuvrra.

 

Ballet kvalitehta jávkat

Fágalihtu riikastivra oaivvilda ahte lea hoahppu sihkarastit sámi našunálateáhtera boahtteáiggi.

– Jus ii boađe ođđa visti fargga, de ballat mii ahte iešlágan dáiddalaš kvalitehta maid teáhter ovddasta jávká, čállet sii preassadieđáhusas.

På forsiden nå