Majestehta Gonagas Harald boahtá Tråante gávpogii ávvudit sámi álbmotbeaivvi. Govva lea govvejuvvon Álttá luossasemináras mannan guovvamánus, go Keskitalo bovdii Majestehta Gonagas Harald boahtit Tråantii 2017. Vuorkágovva: Marit Elin Kemi

Majestehta Gonagas ávvuda sámi álbmotbeaivvi Tråantes

Tråantes šaddet stuora ávvudoalut, main lea viiddis ja máŋggalágan sisdoallu. Ávvučájáhus « Jielemen Aavoe», Duoddarat mu siste, teáhterbihttá Elsa Laula Renberg birra ja golbma beaivásaš álbmotfeasta Torvet:is lea dušše oasáš sisdoalus.

17:13 Skábmamánu 30. beaivi 2016

Vuosttaš sámi riikačoahkkin dollui guovvamánu 6. beaivvi jagi 1917 Tråantes. Sámediggi, Mátta-Trøndelaga ja Davvi-Trøndelaga fylkkasuohkanat ja Tråante suohkan galget fárrolaga lágidit 100 jagi ávvudeami jagi 2017is. Váldoávvudeapmi lea guovvamánu 5. beaivvi rájes 12. beaivái.

 

100 jagi ávvudeapmi

–Ávvudeapmi šaddá vuogas čalmmustahtten 100 jagi rahčamušain sámi giela ja kultuvrra ovddas. Mii leat hui ilus go Majestehtalaš Gonagas ja stáhtaministtar oassálasteba ávvudit sámiid vuosttaš riikačoahkkima, lohká Sámedikki presideantta Áili Keskitalo.

 

Gonagas ja stáhtaministtar

Norgga stáhtaministtar Erna Solberg oassálastte rahpandilálašvuođas mii lea Tråante Torvet nammasaš báikkis guovvamánu 6.beaivvi. Majestehtalaš Gonagas Harald galgá leahkit mielde ávvuipmilbálvalusas Nidarosdomenis, ja čájáhus-rahpamis «Bååstede- máhcahit sámi kulturárbbi» árkabismmagárdimis, ja dasa lassin vel ávvučájáhusas Olavshallas ja ávvugaskabeivviin eahkedis.

 

Ávvučájáhus «Jielemen Aavoe»

Sámi našunála Teáhter ja Kringkastingorkeaster (KORK) doallaba ovttas Tråante 2017 doaluid oktavuođas erenoamáš ávvučájáhusa mii ovdanbuktojuvvo Olvshallas guovvamánu 6. beaivvi. Artistat geat das leat mielde leat Mari Boine, Sofia Jannok, Marja Mortensson Wimme Saari, Iŋgor Ántte, Áilu Gaup, Bjørn Sundquist, Egil Keskitalo ja Mary Sarre.

 

Dramatihkkar bihttas lea Rawdna Carita Eira, komponista lea Frode Fjellheim, dirigeanta lea Anders Eljas ja rešissevra lea Rolf Degerlund.

 

 

På forsiden nå