Golmma minuhtas iskkat borasdávda­vára

Borasdávdasearvi lea ráhkadan quiza, mas golmma minuhtas gávnnahat lea go várra ahte don oaččut prostataborasdávdda.

15:34 Skábmamánu 09. beaivi 2016
Ođastuvvon: 09.11.2016 - 15:42

Beare máŋggas jápmet prostataborasdávddain, muhto seammás leat oallugat geat ballet das, eai ge huma dan birra.

Kreftforeningen, Norgga Borasdávdasearvi, lea álggahan dál našunála diehtojuohkinkampánjja prostataborasdávdda birra.

Prostataborasdávda lea dat borasdávda mii buot dávjjimusat boahtá Norgga dievdduide. Badjel 5000 dievddu ožžot dan davdda jagis, ja badjel 1000 jápmet dainna dávddain, dieđiha Borasdávdasearvi preassadieđáhusas.

Dat mearkkaša ahte jápmet golmmas juohke beaivvi prostataborasdávdda geažil. Dat lohku lassána boahtteáiggis.

 

Dávda mas ballet buot eanemus

Iskkus, man Kantar TNS lea dahkan Borasdávdasearvvi ovddas, muitala ahte prostataborasdávda lea dat borasdávda mas buot eanemus dievddut ballet.

Iskosis bođii maid ovdan ahte dievddut ballet measta liikká olu massimis poteanssa dálkkodeami dihte, go dan ahte jápmit.

– Dan mii gullat maid go olbmot riŋgejit midjiide, lohká Borasdávdasearvvi generálačálli Anne Lise Ryel. Son muitala ahte olu dievddut váldet singuin oktavuođa go leat balus. Seamma vásáhus lea Norgga dábálašmedisiinna searvi. Sin mielas leat beare olu dievddut geat dárbbašmeahttumit ballet.

 

Ráhkadan quiza

Oahpahan dihte dávdda birra, leat Borasdávdasearvi ja Norgga dábálašmedisiinna searvi ráhkadan neahttaquiza, man ii ádján go golbma minuhta vástidit.

Dainna quizain gávnnaha lea go ágga vuorjašuvvat ja ballat borasdávddas.

– Mii eallit huššaáiggis, muhto buohkain lea golbma minuhtta liiggás váldit quiza. Sávan ahte nu oallugat go vejolaš váldet quiza. Sáhttá heakka ja poteanssa gádjut, lohká Ryel.

 

Quiza gávnnat dán siiddus.

På forsiden nå