HÁLIIDA MAŊIDIT VUOITTU: Kárášjohkalaš John Mikkel Somby vuittii mannan lávvardaga Johttisámiid Searvvi vuorbádeamis gáimmis Jon Mikkel Eira iežas kievkkanii ovtta eahkedii. Leage okta erenomáš eahket njukčamánus, goas háliidivčče ávkkástallat vuoittu. Govva: Anne Rasmus

Gáibmi vuittii gáimmi kohkket iežas kievkkanii

Kárášjohkalaš John Mikkel Somby vuittii Jon Mikkel Eira kohkket iežas geahčai ovtta eahkedii, ja sus leage okta erenomáš eahket njukčamánus masa vuoittu háliidivčče geavahit.

10:34 Skábmamánu 07. beaivi 2016

Mannan lávvardaga vuorbádii Kárášjoga Johttisámiid Searvi vuoiti iežaset erenomáš gilvvus. Ja lei John Mikkel Somby, gii vuittii sámi dovddus koahka Jon Mikkel Eira iežas kievkkanii ovtta eahkedii.

– Mun in jáhkkán ahte vuoittán, go in láve goassige vuoitit maidige, lohká movttegis Somby vuossárgga Ávvirii.

 

Erenomáš beaivi

Ávvir čálii čakčamánus Kárášjoga Johttisámiid Searvvi birra, mii áiggui čađahit erenomáš gilvvu, mas ođđa miellahtut sáhtte vuoitit sámi dovddus koahka ovtta eahkedii.

Dát leige okta sivva manin John Mikkel Somby searvvai gilvui. Dađi bahábut ii lean ieš mielde go vuorbádeapmi čađahuvvui.

– Dát lei hui somás gilvu ja jurddašin ahte háliidan fas miellahttun, muitala Somby, gii oktii árat leamaš miellahttu, muhto lea nu guhkes áigi, ahte ii oba muittege goas dat lei.

 

Áigu gullat sáhttágo maŋidit

Ávvir jearrá ahte goas ja mo son lea jurddašan geavahit vuoittu.

– Mus lea 50-jagi beaivi njukčamánus boahtte jagi, nu ahte lei heivet hui bures dalle ávkkástallat vuoittu, muitala vuoiti, gii áigu gullat koahkas sáhttágo maŋidit iežas vuoittu.

 

Ferte ieš gávppašit

Jon Mikkel Eira lohká iežas ožžon inspirašuvnna earet eará Mátta-Norggas dahkkon TV-ráidduin, gos sáhttá vuoitit beakkán koahka ruoktot málestit.

Sáhka ii goittot lean dušše ahte Eira galgá dušše kohkket vuoiti gievkkanis, muhto son maiddái ráhkkana guossohit gussiide. Muhto lea goittot vuoiti gii galgá borramušaid gávppašit.

 

Ii dieđe vuos

Dasa lassin sáhttá vuoiti ieš válljet, ahte háliida go ieš kohkket ja Eira bagadallá su, vai háliida go ieš servvoštallat gussiiguin dassá go mális lea gárvvis.

Vuoiti oažžu ieš válljet ovtta eahkeda juovlamánus ja Jon Mikkel Eira lohpida eahkeda šaddat measta seamma buorre go juovlaruohtta.

– Na mun in dieđe vuos goappá molssaeavttu válljen ja dan ferten oaidnit maŋŋá, dadjá John Mikkel Somby.

 

Gilvvus ávki

Searvvi jođiheaddji Leif Ánde Somby muitala sin háliidit dainna vugiin geasuhit ođđa miellahtuid, ja dasa háliidii sámi dovddus koahkka Jon Mikkel Eira veahkehit.

Gilvu bisttii čakčamánu lohppii, mas namalassii sáhtii vuoitit iežas gievkkanis su kohkket ovtta eahkedii. Jurdda maiddái lei ealáskahttit ja movttiidahttit olles searvvi.

– Dán gilvvus lei ávki ja mii leat ožžon ollu ođđa miellahtuid. Muhto jáhkán mii fertet dákkár gilvvuid lágidit álgojagi, eatge ná maŋŋit, dadjá son.

På forsiden nå