Dát miessi šattai easka čakčamánus, dábálaččat lea guottetáigi miessemánus. Priváhtagovva: Johan Mathis Kemi

Miessi šattai čakčamánus

Dábálaččat guddet álddut miessemánus, muhto Johan Mathis Kemi áldu guttii njeallje mánu maŋŋel.

10:32 Golggotmánu 03. beaivi 2016
Ođastuvvon: 03.10.2016 - 11:00

Kárášjohkalaš Johan Mathis Kemi lei jo johtán geasseorohagas Stiikonjárggas Máhkarávjjus go áldu guoddigođii.

– Čakčamánu 18. beaivvi guttii áldu Stuorračearus, mii leimmet justa johtimin čakčaorohahkii Sáđevuopmái, muitala boazodoalli.

 

Ovdal vásihan

Guottetáigi lea dábálaččat njeallje mánu árat.

Kemi dadjá oalle erenomážin ahte áldu guttii dán mađe maŋŋit, muhto son lea ovdal vásihan seamma.

– Vaikke dá lea hárvenaš dáhpáhus, de dat dáhpáhuvvá gal. Lean ovdal vásihan ahte áldu guttii golggotmánus. Áhčči ges lea vásihan guoddima láhka skábmamánu, muitala Johan Mathis Kemi.

 

Ragat njukčamánus

Maŋŋel go miessi šattai, de bidjalii Kemi gova miesis iežas Facebook neahttasiidui.

– Muhtimat imaštalle dáhpáhusa. Dien njiŋŋelasas lei rágat easka njukčamánu loahpas, mun oidnen dalle jo ahte varihat vázze maŋis, čilge son.

 

Ii beassan eallit

Čakčadálvi lea vuordimis, ja Kemi lea johtimin ealuinis.

Danin ii oaidnán eará čovdosa go goddit miesi:

– Miessi ii livččii ceavzit, dat livččii jápmit go galmmat álget. Šadden maid goddit miesi vai áldu ii báze jođedettiin. Áldu orui miesi luhtte vel guokte diimmu maŋŋel go gazirdin dan, muhto dat manai bures, lohká Kemi.

 


Boazodoalli Johan Mathis Kemi. Govva lea váldon miessemearkuma oktavuođas moatti jagi áigi.
Priváhtagovva
 

 

 

På forsiden nå