Deanučázádaga Guolástanhálddahusa stivrajođiheaddji Steinar Pedersen. Vuorkágovva: Astrid Helander

– Ođđasit soahpat dahje cealkit eret

Finnmárkku stuorradigge- ja fylkkadiggeáirasat leat buktán cealkámuša evttohuvvon Deanučázádaga soahpamuša birra ja gáibidit ahte soahpamuša sohpet ođđasit dahje celket eret.

10:44 Čakčamánu 22. beaivi 2016
Ođastuvvon: 22.09.2016 - 11:30

Finnmárkku stuorradigge- ja fylkkadiggeáirasat meannudedje čakčamánu 20. beaivvi oktasaš cealkámuša evttohuvvon Deanučázádaga soahpamuša birra ja gáibidit ahte dát soahpamuš gaskal Norgga ja Suoma ođđasit sohpet dahje celket dan eret.

 

Ii beassan cealkit maidege

Cealkámušastis čujuhit earret eará gulahallanvuohkái, oanehaš gulahallanáigái ja maiddái soahpamuša sisdollui.

Iige Finnmárkku fylkkagielda leat ožžon soahpamuša gulaskuddamii, iige leat ožžon vejolašvuođa cealkit maidege. Finnmárkku fylkkamánni Fylkkalávdegoddi doarju stuorradiggeáirasiid cealkámuša ollásit.

 

Rihkku Deanulága

Cealkámušas ávžžuhit ahte soahpamuš ii dolvojuvvo Stuorrádiggái dohkkeheapmái, go báikeolbmuide addui menddo oanehaš gulaskuddanáigi, sin máhttu ii leat mielde, Deanučázádaga guolástanhálddahus ja Sámediggi eai leamaš mielde loahpalaš šiehtadallamiin nu mo Deanuláhka gáibida, Deanulága rihkkun ja ahte Supmii addo válddi mearridit mearraluosabivddu Norgga rittus.

 

Dasa lassin oaivvildit ahte ii leat riekta addit Suoma beal bartaeaiggádiidda geat ásset mátta Suomas báikeolbmuid vuoigatvuođaid.

 

Ođđasit dahje cealket eret

Finnmárkku fylkkagieldda fylkkalávdegoddi čujuha oktasaš cealkámuššii ja doarju fylkka stuorradiggeáirasiid ovttajienalaččat.

Bargiidbellodat, Kristtalaš álbmotbellodat, Olgeš, Ovddádusbellodat, Gurutbellodat ja Miljøpartiet De Grønne evttohit ovttajienalaš Deanučázádaga soahpamuša ođđasit soahpat Suomain dahje cealkit eret.

 

– Čielgasit ovttajienalaččat

Deanučázádaga hálddahusa stivrrajođiheaddji Steinar Pedersen lohká illudahttin go buot Finnmárkku stuorradigge- ja fylkkadiggeáirasat, beroškeahttá bellodatgullevašvuođas, nu čielgasit ovttajienalaččat dieđihit dát ii leat dohkálaš.

– Mii giitit Fylkalávdegotti ja doaivut guovddáš departemeanttat čuovvolit Finnmárkku stuorradigge- ja fylkkadikkepolitihkkáriid ávžžuhusa.

 

 

 

 

På forsiden nå