LIĐIID BUKTÁN: Olbmot leat bidjan liđiid olggobeallai viesu gos goddimat galget leat dáhpáhuvvan. Govven: Silje Malene Varsi

Politiijat almmuhan namaid sudnos geat gottáhalaiga

Politiijat duođaštit lei 37-jahkásaš Pimsiri Songngam ja su 12-jahkásaš bártnáš Petchngam Songngam geat gottáhalaiga vuossárgga ija Girkonjárggas.

11:12 Borgemánu 30. beaivi 2016
Ođastuvvon: 30.08.2016 - 11:27

Politiijat duođaštit ahte lei 37-jahkásaš Pimsiri Songngam ja su 12-jahkásaš bártnáš Petchngam Songngam geat gottáhalaiga Girkonjárggas vuossárgga ija borgemánu 29. beaivvi.

Soai leigga Thaieatnama stáhtalahtut ja sudnos lei orrunlohpi Norggas.

 

Sáddejuvvon rumašrahpamii

Finnmárkku politiijaguovllu lea ožžon formálalaš duođaštusa Thaieatnama ambassádas ahte sudno oapmahaččat leat ožžon dieđu.

Politiijat dieđihit preassadieđáhusas sii leat čađahan máŋga gažadeami, ja taktihkalaš dutkanbargu joatká eanet gažademiiguin ja eará dutkamiin.

Politiijat leat áššáiduhttán albmá gean navdet goddán iežas eamida (37) ja eamida bártnáža (12), politiijat leat dutkamis sihkkarastán duođaštusaid, muhto sii eai leat sáhttán čađahit gažademiid albmáin go lea dieđuheapme Romssa universitehtabuohcciviesus.

Goddon nisu ja su bártnáš sáddejuvvoba riektemedisiiinnalaš instituhttii Romsii, dat gaskaboddosaš boađus dutkamis vurdojuvvo válbmánit áramusat boahtte vahkku, dieđihit Finnmárkku politiijaguovllus.

(Ášši joatká gova vuolábealde)


KRIPOS BOAHTÁN: Kripos lea sajis čađaheamen teknihkalaš dutkamiid.
Silje Malene Varsi govven.

Čađaheamen dutkamiid

Finnmárkku politiijaguovllu áššáskuhttinjođiheaddji Morten Daae muitala Kripos lea dál sajis ja čađaheamen dutkamiid ásodagas gos goddimat dáhpáhuvve.

– Kriposa bálvvát bohte ikte eahkedis ja leat odne sajis čađaheamen dutkamiid. Mun in dieđe man ollu sii leat ollen dutkat, muhto leat dál ollislaš dutkamat, sihke taktihkalaš ja teknihkalaš dutkamat, dadjá áššáskuhttinjođiheaddji Morten Daae.

På forsiden nå