BISSEHIT: Eanandoallodirektoráhta boazoduolloossodaga direktevra Magnar Evertsen lea evttohan bissehit bággonjuovvanplánaid Jovsset Ánte Sara siidaoasi vuostá. Govva: Marit Elin Kemi

Direktoráhta ráđđe Boazodoallo­stivrra geassit áitaga

Eanodoallodirektoráhta boazoduolloossodaga direktevra ráđđe Boazodoallostivrra bissehit baggonjuovvanáitaga Jovsset Ánte Sara vuostá. Dál mieđiha Eanandoallodirektoráhta direktevra ahte sii eai lean galgan sáddet baggonjuovvandieđu Sarai.

14:05 Suoidnemánu 21. beaivi 2016
Ođastuvvon: 21.07.2016 - 19:45

Eanandoallodirektoráhta lea odne iđitdiimmuin evttohan bissehit bággonjuovvanplánaid máid ledje ovdagihtii dieđihan Fála boazodoallái Jovsset Ánte Sarai. Dan duođašta Eanodoallodirektoráhta boazoduolloossodaga direktevra Magnar Evertsen Ávvirii.

– Mun sáhtán dál juo dadjat ahte mii Eanandoallodirektoráhtas evttohat Boazodoallostivrii ahte bággonjuovvamat eai galgga čađahuvvot ovdalgo lágafámolašduopmu lea gahččan Jovsset Ante Sara áššis, dadjá Eanodoallodirektoráhta boazoduolloossodaga direktevra Magnar Evertsen.

 

Maŋidit ášši

Eanodoallodirektoráhta boazoduolloossodaga direktevra deattuha ge dál, ahte sii bohtet maŋidit ášši dassái diggevuogádagas lea loahpalaš duopmu.

– Lea sáddejuvvon nu gohčoduvvon «ovddalgihtii diehtu bággonjuovvamii» Jovsset Ante Sarai, gos Eanandoallodirektoráhta dáhttu su buktit cealkámuša áššis ovdal borgemánu 3. beaivvi. Lea áibbas dábálaš sáddet diekkár «dieđuid» stáhtas, go lea sáhka duođalaš mearrádusain, lohká direktevra, ja joatká:

– Lea dehálaš áddet ahte dát ii leat bággonjuovvan mearrádus. Mii boahtit rávvet Boazoduollostivrra maŋidit ášši dassái lágafámolašduopmu lea celkon dán áššis, dadjá direktevra Magnar Evertsen.

 

– Eat livččii galgan sáddet

Ávvir jearrá manne Eanodoallodirektoráhta lea válljen sáddet dákkár bággonjuovvandieđiheami Jovsset Ánte Sarai ovdal ášši lea loahpahuvvon diggevuogádagas. Dál mieđiha Evertsen boastut formuleren reivve dán áššis.

– Soaitá mii livččiimet eará láhkái sáhtán formuleret. Mun in lean barggus go dat dahkkui. In dieđe manne mearriduvvui sutnje sáddet dákkár diehtu. Dat mii lea dehálaš ahte dat lea dušše okta diehtu, ja ii leat dán áššis dahkkon konkrehta individuella árvvoštallan, go leat sáddejuvvon golbma seammalágan reivve golmma eará siidaosiide geat eai leat olahan mearriduvvon boazologuid, čilge son.

 

Árvvoštallet

Magnar Evertsen muitala ahte viidásat áššemeannudeapmi áššis lea dat, ahte Eanandoallodirektoráhta áigu árvvoštallat vuđolaččat dan golbma ášši mat leat dieđihuvvon, maŋŋá borgemánu 3. beaivvi.

– Dalle ovddidat ášši Boazodoallostivrii gos mii evttohat makkár mearrádusat galget ovddiduvvot. Lea Boazodoallostivra mii cealká mearrádusaid dáid áššiin, ja sis lea boahtte čoahkkin čakčamánu 12. beaivvi, čilge Eanodoalludirektoráhta boazoduolloossodaga direktevra Magnar Evertsen.

 

- Terror


TERROR: Jovsset Ánte Sara oaivvilda leat terror mo Eanadoallodirektoráhta hálddaša ášši. Govven: Inga Marie Guttorm

Jovsset Ánte Sara oaivvilda aŋkke, ahte dat lea terror mo Eanadoallodirektoráhta hálddaša ášši, vaikke lohket dan dušše diehtun.

– Dat čuočču gal mu namma dan báhpáris, ja nubbi lea ahte sáhkkui ain gal liikká sáddejit. Mu mielas gal lea ain dát ášši hui ártet, dat orru liikká dego terror olbmo vuostá, persovnnalaš terror mu vuostá. Sáddejit diekkár reivve, ahte sáhttet vaikke goas boahtit. Eai dárbbaš gulahallat olbmuin ja sáhttet vaikke goas rivvet ealu. Lea álki lohkat mediaide, ahte eai livčče galgan sáddet dien reivve munnje. Mu mielas gal orru dat liikká dego terror olbmo vuostá, dadjá Jovsset Ánte Sara.

På forsiden nå