BOKTIT ŠATTAI: Boazodoalli Johan Ivvár Gaup šattai mannat gitta gappa lusa ja moddii boktit ovdal go lihkai. Govva lea váldon filmmas man son lea filbmen go bovttii gabba bohcco. Šearbmagovva

Šliedda gabba … muhto ii okta ge dieđe manin

Dákkár vásáhusa leat máŋgii boazosápmelaččat vásihan, namalassii ahte gabbaboazu ii lihka go earát lihkket ja čuožžilit livas. Ii dieđe okta ge juste manin gabbaboazu lea dakkár, eai ge leat áigumušat dutkat ge. Geahča video!

13:52 Geassemánu 09. beaivi 2016

Olu boazosápmelaččat leat vásihan ahte gabbaboazu lea hui oađđálas, dahje šliettas, dahje duođai eai dieđe mii dat lea dan bohccos. Go eará bohccot leat livas njuiken ja vázzilan, de báhcá dát ain livvadit. Juo, oažžu njulgestaga mannat lusa ja čugget suorpmain, nu lossadit oađđá. Dan beasai Johan Ivvár Gaup vásihit dán giđa, go lei ealu vuodjime guottetbáikkis.

 

Boktalit

– Ledjen ravdda čorgemin go fuomášin beana doppe jorrá bievllas. Fuomášin boazu dat lea. Go mannen lagabui, de oainnán livas dat lea ain okta boazu, ii ge gula mu skohtera, ii ge beatnaga ge, go birra ruohtada. De mun dohppejin telefovnna lummas ja filbmejin movt láhtte go boktalan, muitala son.

Gaup lea guotteheame ealu Fiellážiin, duottarguovlu gaskal Máze ja Joatkka, Oarje-Finnmárkkus, go filbmii dáhpáhusa.

 

Son ii loga diehtit manin gabbaboazu lea diekkár.

 

Ášši joatká gova vuolde:


Boazodoalli Johan Ivvár Gaup.
Vuorkágovva: Nils Johan Vars

Oahpis boazosápmelaččaid gaskkas

Ahte gabbaboazu ii gula go boazovázzi boahtá, go lea báhcán livvadit go eallu lea mannan, ii leat amas boazosápmelaččaide. Dađi bahábut dutkanbirrasiin eai dieđe dan birra duođi eambbo. Ávvir lea hupman Norgga Luonddudutkaninstituhta (NINA) dutkiiguin, muhto sii eai sáhte dasa vástidit.

Dutkanhoavda Morten Kjørstad lohká dovdat sin dáhpáhusa, muhto ii sáhte dadjat manin nu geavvá ja mii lea duogáš dasa.

– Ii ge leat mu dieđus dutkan ge čađahuvvon dán birra, čállá son e-poasttas, ii ge sáhte dadjat lea go die juoga maid áiggoše dutkat.

 

Eai dutkan

Norgga biras- ja biodieđalaš universitehta professor, Øystein Holand, duođašta Ávvirii ahte sii eai ge leat dutkan duođi eambbo gabbabohcco šlieddavuođa birra. Sii dihtet gal dan birra. Son lohká dat orru leamen nu ahte gabbaboazu lea šlieddasit go eará bohccot.

– Orru leamen nu ahte gabba bohccos leat genat mat buktet iešláganvuođa, nu go šlieddavuođa, lohká Holand, ja lasiha vel:

– Gottiid gaskkas eai gávdno báljo gappat.

 

Ášši joatká vuollelis:


Norgga biras- ja biodieđalaš universitehta professor, Øystein Holand.
Pressegovva: Norgga biras- ja biodieđalaš universitehta

Eai dieđe vuorraset olbmot ge mii sáhttá gabbabohccos leat.

 

– In dieđe gal juste manin gabbaboazu lea dakkár mii lea oađđálas, muhto dat lea goit dakkár. Lean gal vásihan earaguolggat bohccuid maid, go daid šaddá boktit, muhto gabba lea dávjjimusat dakkár. Mun dieđán dat oađđá lossadit, go láve nu njuiket ja suorganit go boktá gappa livas, muitala Norgga Boazosápmelaččaid Riikkasearvvi ovddeš ovdaolmmoš, Nils Henrik Sara (60).


Norgga Boazosápmelaččaid Riikkasearvvi ovddeš ovdaolmmoš, Nils Henrik Sara.
Vuorkágovva: Nils Johan Vars

– Na mun lean gullan ahte beaivi goardá eambbo gappa go eará bohccuid, ja danin lea nu nagir ahte ii veaje lihkkat livas vaikko movt livččii. Mun lean máŋgii šaddan čoarvái mannat dohppet ja loktet, de gal suorgana ja njuike. Dat lea nagirdiŋga, nu mii lávet dadjat. Albma gabba lea hui buorre boazonálli, muhto gabbačuoivvat ja jievja lea hui heajos boazonálli, nu lean goit mun vásihan, lohká Mathis Nilsen Eira.

 

Ášši joatká vuollelis:


Skuohtanjárgga  boazodoalli ja Norgga Sámiid Riikkasearvvi sámediggeáirras, Mathis Nilsen Eira.
Vuorkágovva: Mathis Nilsen Eira

– Dat gal lea nu oađđálas ahte šaddá muhtumin juo čoarvái dohppet ja ravgestallat ovdal go gullá. Go de gullá, de gal ruohtasta ja lea nu seahka siste ahte ii dieđe gosa galgá ruohttat. Mun in gal dieđe manin gabbaboazu lea diekkár, in ge leat gal dan duođi eambbo jurddahan ge manin nie lea. Lean vásihan earálágan bohcco maid nohkkame nannosit, muhto dan ii láve nie dárbbahit boktalit go gappa, muitala Johan Aslak Logje.

 

Ášši joatká vuollelis:


Cohkolaga boazodoalli Johan Aslak Logje.
Vuorkágovva: Nils Johan Vars

 

Manai bures

– Dán háve goit bokten dien, nu ahte manai bures, lohká Johan Ivvár Gaup vel loahpas.

 

På forsiden nå