2009:s lei Vuohču joavku SomBy mii ovddastii Sámi ja vuite Liet-gilvvuid. Vuorkágovva: Sandro Weltin / Council of Europe

– Dieđusge Liet váikkuhii SomBy beaggimii

Liet International lávlungilvvut lágiduvvojit Guovdageainnus skábmamánus. Ovddeš vuoiti lohká Liet leat stuorra gilvun, olgoriikka media beroštumi dáfus, ja dat váikkuhedje sin dovddusvuhtii.

12:44 Miessemánu 02. beaivi 2016

Liet international

Frisalaččat (Davvi-Vuolleriikkas) álggahedje Liet International lávlunfestivála regionála ja minoritehtagielaid váste, ja lágiduvvui vuosttaš geardde Frieslándda oaivegávpogis Ljouwert/Leeuwardenis 2002:s.

 

2006 rájes lea festivála mátkkoštan birra Eurohpá ja 2008 rájes Eurohpáráđi suodjalusa vuolde.

 

Dan rájes go Liet International álggahuvvui 2002:s, leat Sámi Grand Prix (SGP) vuoitit oassálastán gilvvus ja vuoitán olles njealje geardde.

Lávvardaga skábmamánu 26. beaivvi lágiduvvo Liet International 11. geardde ja dán háve Guovdageainnus Davvi-Norggas, Sámi ja Sámi Grand Prix ruovttus.

 

– Vaikko man gallii jearahallamis

2009:s lei Vuohču joavku SomBy mii ovddastii Sámi ja vuite gilvvuid Frieslándda oaivegávpogis Ljouwert/Leeuwarden. Joavkku čuojaheaddji Oula Guttorm lohká vuoitit Liet lávlungilvvu dieđusge váikkuhii sin beaggimii, muhto lea váttis mihtidit man ollu lassánii sin dovddusvuohta.

– Gilvvut eai lean gehččiid dáfus nu stuorrát go SGP, muhto oasseváldiid ektui lei stuoris go nu ollu iešguđet guovlluin bohte, ja maiddái go lei ollu media doppe. Maŋŋel go leimmet vuoitán, de leimmet vaikke gallii jearahallamis, sihke TV:s ja eará mediain, nu ahte dienu leat gilvvut geasuheaddjit mediai, lohká son.

 

Sámi musihkkafeastivála čállá preassadieđáhusastis ahte Liet International geasuha juohke jagi mediaberoštumi BBC rájes gitta Al Jazeerai ja lea šaddan okta dain stuorimus dáhpáhusain ovddidit minoritehtagielaid.

 

Čatnan oktavuođaid

Guttorm muitala dat attii vejolašvuođa čatnat oktavuođaid eará guovllu artisttaiguin.

– Mii leimmet doppe measta vahkku, ja oahpásnuvaimet ja deaivvadeimmet earáiguin ja beasaimet gullat movt eará unnitálbmotgielaid musihkkariin lea dilli.

 

Čájehit sámi beaivválaš eallima

SMF čállá dán jagi festivála šaddá erenoamáš festiválan.

Go temperatuvra lea vuollel 30 buolašgráda, gilážis mas orrot vuollelaš 1400 olbmo, geain 95 proseantta lea sámegiella eatnigiellan ja 40 proseanttas lea boazodoallu ealáhussan, de sáhttá gohčodit dan eksohtalaš vásáhussan. Diet addá Liet International oasseváldiide ja festivála gussiide buori ipmárdusa sámi beaivválaš eallimis dán árktalaš guovllus.

 

Lávlut eanet go dušše ovtta lávlaga

Guttorm lohká lea buorre go Liet viimmat galgá Sámis lágiduvvot, go addá vejolašvuođa sámiide maid vásihit daid gilvvuid.

– Dalle go mii leimmet mielde, eai lean nu ollu liigedoalut gilvvus, ja artistan gal livččii somát, go juo lea nu guhkás mátkkoštan, lávlut eanet go dan ovtta lávlaga. Vaikko dollestit konseartta eará beaivvi go dat gilvu leat.

På forsiden nå