Jus šaddá nu movt Liet háliida, de lágiduvvo Liet International Eurohpá unnitlogugielaid lávlungilvu Guovdageainnus, ja SGP vuoiti Ella Marie Hætta Isaksen beassá ovddastit Sámi Sámis. Vuorkágovva: Sara Maret Ravdna Oskal

Liet gilvu Sápmái ja Guovdageidnui

Riikkaidgaskasaš Liet International Eurohpá unnitlogugielaid lávlungilvvu gulahallanolmmoš muitala sii leat dál geahčadeame vejolašvuođaid lágidit gilvvu Sámis dán jagi, ja galget Guovdageainnus fitnat boahtte vahkku.

14:10 Cuoŋománu 19. beaivi 2016
Ođastuvvon: 07.04.2017 - 11:18

Liet gilvvu gulahallanolmmoš Tjallien Kalsbeek muitala sii galget juo boahtte vahkku Guovdageidnui deaivvadit Sámi Musihkkafestiválain digaštallat vejolašvuođaid sáhttet go sii váldit badjelasaset lágideami.

– Diibmá ii lágiduvvon Liet, ja mii mearrideimmet ahte galgá lágiduvvot juohke nuppi jagi. Nu ahte dán jagi, ja jus manná movt mii leat jurddašan, de lágiduvvo dat Guovdageainnus, muitala Kalsbeek.

 

Liet lávlungilvvut:

Liet lea riikkkaidgaskasaš lávlungilvu Eurohpá unnitlogugielaide, mii lágiduvvui vuosttaš geardde Frieslánddas 2002:s. Ulbmil gilvvuin lea ovddidit beroštumi eurohpálaš unnitlogugielaide, earenoamážit nuoraid gaskkas. Sápmi lea vuoitán finála viđa háve, ja ovddeš vuoitit leat: Transjoik, Niko Valkeapää, Johan Sara Jr., Johan Kitti ja Ellen Sara Bæhr, ja Somby-joavkku.

 

Gávdnat ruhtadeddjiid

Kalsbeek muitala Liet lágideaddjis gáibiduvvo ahte sáhttet váldit oasseváldiid vuostá miehtá Eurohpá,ordnet orrunsajiid sidjiide, ferte lávdi ja rusttegat ortnegis ja muđui vejolašvuohta lágidit gilvvu.

– Deháleamos lea ahte sii nagodit ruđalaččat lágidit gilvvu. Nu movt leat jurddašan, de galgá Sámi musihkkafestivála gávdnat ruhtadeddjiid, danne go sis leat Sámi guovllus oktavuođat. Dat sáhttet leat nu movt suohkan, fylka, Sámediggi ja earát, lohká Kalsbeek.

 

Dárbu báikkálaš doarjagii

Lietis lea váldokantuvra Nederlánddas ja Kalsbeek muitala lea váttis organiseret gilvvu eará riikkain.

– Nederlánddas leat vuolidan kulturdoaluide ruhtademiid, ja danne leat sorjavaččat ahte báikkit gos lágidit gilvvuid, doppe lea báikkálaš ruhtadeapmi, muhto Liet galgá veahkkin, lohká son.

 

(Ášši joatká gova vuolábealde)


Sámedikki ráđđelahttu Henrik Olsen lohká sis sáhttá kulturruđaid ohcat. Vuorkágovva: Kila Anti

Vejolaš oažžut doarjaga

Sámedikki ráđđelahttu Henrik Olsen, gii lea kulturáššiid ovddasvástideaddji politihkar, lohká Sámedikkis lea vejolaš ohcat ja oažžut doarjaga.

– Mis lea ohcanortnet mas sáhttá kulturruđaid ohcat, ja jáhkán dát Liet gilvvut mannet dan poastta vuollái go das lea Sápmi ja sámegiella oassálastán buot háviid mielde, ja maiddái lea bures dahkan ja máŋgii vuoitán. Jus muittán riekta, de lea vejolaš ohcat 150 000 ruvnno rádjái doarjaga dan poasttas, lohká son.

Olsen lea hui positiiva go gilvu plánejuvvo fas Sápmái.

 

– Eat hálit manahit

Guovdageainnu sátnejođiheaddji Johan Vasara lea hirbmat rámis go suohkanii galgá dákkár internašunála gilvu boahtit.

– Dat lea illusáhka ja dán eat hálit manahit. Mis lea dáhttu doarjut ruđalaččat, ja dán eat hilggo, muhto mii fertet álggos oaidnit ohcamuša makkar ruhtasupmis lea sáhka, ja lea go mis várri dasa, lohká Vasara.

 

(Ášši joatká gova vuolábealde)


Guovdageainnu suohkana sátnejođiheaddji Johan Vasara ii hálit gilvvu manahit. Vuorkágovva : Astrid Helander

Gudni ovddastit Sámi

Liet gilvui oassálastet unnitlogugielat miehtá Eurohpá, ja Sámi ovddasteaddji gilvvus lea álo Sámi Grand Prix vuoiti. Dán jagáš SGP vuoiti Ella Marie Hætta Isaksen leage kvalifiserejuvvon gilvui, muhto ii loga dađi bahábut gullan gilvvu birra goassige.

– Lea imaš go in leat gullan gilvvu birra, muhto livččii goitge gudni ovddastit Sámi gilvvus. Lea váttis lohkat nu ollu dan birra go dađi bahábut in leat gullan dan birra ovdal.

 

 

Ávvir ii leat lihkostuvvan oažžut ságaide Sámi musihkkafestivála ovddasteddjiid.

 

 

 

 

På forsiden nå