Sámedikki presideantta Áili Keskitalo ja Sámedikki ráđđeláhttu Silje Karine Muotka, geas lea ovddasvástádus boazodoallogažaldagaide.

– Dálá boazodoallo­láhka ferte guorahallot ođđasit

Sámedikki presideantta Aili Keskitalo jáhkká duopmu Jovsset Ánte Sara áššis váikkuha stáhta boazodoallopolitihkkii, ja oaivilda dálá boazodoalloláhka ferte guorahallot ja geahčaduvvot ođđasit.

12:12 Njukčamánu 19. beaivi 2016
Ođastuvvon: 21.03.2016 - 08:58

– Mun konstateren ahte Sis-Finnmárkku diggegoddi lea fámohuhttán Eanandoallo- ja biepmodepartemeantta mearrádusa, mas gáibiduvvui Jovsset Ánte Sara siiddaoasis geahpidit boazologu. Lean positiivalaččat hirpmahuvvon dán nuorra boazodoalli ráhččamušaid dan vuostá maid son vásihii áibbas vuoiggameahttumin. Dađi bahábut leat ollu eanebut go son geat leat vásihan ahte boazologuheiveheapmi lea buktán vuoigatmeahttunvuođaid, lohká Keskitalo.

 

Prinsihpalaš bealli

Sámediggi lea čuvvon ášši stuora beroštumiin, go oaivvildit ahte das lea prinsihpalaš bealli mii guoská boazologuheivehan prosessii. Sámediggi lea maid várren eanadoallodepartemeantta boazologuheivehan proseassa guhkit áiggi.

– Dat duopmu čájeha ahte min vuorjašumit ledje duođat. Boazologuheiveheami ášši lea maŋemus gieđahallon Sámedikki plenumis njukčamánus, lohká presideantta.

 

Váikkuhus

Keskitalo lohká dat lea leamaš allaprofiillalaš diggeášši mii sáhttá buktit stuora váikkuhusaid dan boazologu muddemii mii dál lea jođus Finnmárkkus.

– Duomu váikkuhus lea ahte boazologu heiveheamit fertejit árvvoštallot ođđasit. Dan duomu ferte eanandoaluministtar váldit duođalaččat. Viidásit váikkuhus ferte leat ahte Mii áigut stuora beroštumiin čuovvut ášši, lohká Keskitalo.

Fáddásánit
Ođđasat

På forsiden nå