Nuorra boazodoalli Jovsset Ante Sara lea giitevaš doarjaga ovddas. Govven: Inga Marie Guttorm

Álggahan ruhtačoaggima Jovsset Ántii

Priváhta olmmoš lea bidjan johtui ruhtačoaggima nuorra boazodoallái Jovsset Ante Sarai,  gii dán vahkku lea lágastan Sis-Finnmárkku diggegottis stáhta vuostá.

15:32 Guovvamánu 03. beaivi 2016
Ođastuvvon: 04.02.2016 - 08:13

– Dat lea proteasta stáhta vuostá, go mu mielas lea stáhta ovttatládje ja bearehaga bidjan gáibádusaid boazodolliide, ja mun oainnán dan dehálažžan doarjut nuorra luntta gii okto lea lágasteame stáhta eahpevuoiggalašvuođa vuostá. Das lea dat ášši deháleamos, ja dat guoská oba ollusiidda. Dat guoská munnje, mu villjii gii maid okto siiddastallá  ja guoskka olles boazodoalu boahtteáigái, lohká Marit Inga Sara Pettersen, gii lea bidjan johtui ruhtačoaggima.

 

Olusat beroštumi čájehan

Marit Inga Sara Pettersen lea ikte rahpan konto báŋkkus, ja čoaggigoahtán  ruđa boazodoallái Jovsset Ánte Sarai. Pettersen čilge son lea álggahan ruhtačoaggima danne go  dat ášši lea boktán su beroštumi. Son muitala otne iđđes lei kontui juo boahtán váile 11.000 ruvdno, ja olusat leat váldán sutnje oktavuođa, čájehan beroštumi ja áigot doarjut.

– Ruhta galgá geavahuvvot dán áššái,muhto jus geavvá nu ahte ruhta mii čoggo ii dárbbašuvvo dán áššis, de lean jurddašan álggahit foandda mii galgá geavahuvvot sullásaš áššiide, lohká Sara Pettersen.

 

Vuordán doarjaga

Sara Pettersen ii loga imaštallat go ruhtačoaggimii lea stuora beroštupmi.

– Mun gal ipmirdan ja ledjen vuordán ahte goit áinnas boazosápmelaččat dorjot dán ášši, go das leat stuora váikkuhusat, movt dál de manna, lohká son.

 

Giitá doarjaga ovddas

Jovsset Ánte Sara lea hui giitevaš doarjaga ovddas ja lohká buorre oaidnit ahte ii leat okto.

– Ferten giittit buohkaid, ja lean njuorasnuvvan go dákkár stuora doarjaga lean ožžon. Mun jurddašan ahte leat ollu olbmot geat dovdet sii leat dulbmojuvvon stáhtii, ja go garra dovdu lea,  de dat boktá stuora beroštumi doarjut dákkár ášši, lohká son.

 

(Ášši joatká gova vuolábealde)


Jovsset Ante Sara ja su bealušteaddji Trond Biti.
Govven: Inga Marie Guttorm

 

– Riska stáhtain lágastit

Jovsset Ante Sara bealušteaddji Trond Biti muitala su klieanttas lea dal leamaš dikkis nuvttá riekteveahkki.

– Das lea dieđusge riska vuoittáhallat ja de sáhttá šaddat máksit stáhta áššegoluid, mat leat 120.000 ruvnno. Nubbi bealli lea ahte Jovsset Ántii leat čadnon bággosáhkut, mat leat 8000 ruvnno mánnui, ja jagis gárta dat lagabui 100.000 ruvnno, lohká Biti.

 

Nuppes ii nuvttá

Biti lohká jus Sara vuoittáhallá ja guoddalit galgá lágamánneriektái, de lea dohko riektedivat máŋgalogi duháha ruvnno.

– Nuvttá riekteveahkki doaibma dainna lágiin ahte advokáhtta sádde rehkega stáhtii, ja dainna lágiin ii dárbbaš klieantta ieš máksit advokáhta goluid. Jus guoddala ášši, de sáhttá stáhta lohkat ahte go juo lea oktii geahččalan ášši, de eai nuppes mieđa addit friddja riekteveahki, lohká Biti.

 

Ekonomalaš roassu

Biti lohká vearrámus mii sáhttá dáhpáhuvvot lea ahte ášši manna gitta alimusriektái ja Jovsset Ante šaddá ieš máksit.

– Alimusriektái lea divat máŋgačuođi duhát, ja jus vuoittáhallá doppe, ja gártá áššegoluid máksit,  de sáhttá sutnje dagahit ekonomalaš roasu. Muhto dat lea vearrámus jurddašuvvon einnosteapmi, lohká Biti.

 

 

 

 

Fáddásánit
Ođđasat

På forsiden nå