Per Edvard Johnsen bealkkahalai amas olbmui go lei iežas gussiid doalvume biillain meahccái. Vuorkágovva.

Oaččui gullat rievssatbivddus

Duottarstobu jođiheaddji ii leat goassige ovdal vásihan ahte bealkkahallat go lea gussiid doalvume meahccái.

13:29 Čakčamánu 14. beaivi 2015
Ođastuvvon: 14.09.2015 - 13:57

Vuolit- Molleža duottarstobu jođiheaddji Per Edvard Johnsen lei bearjadaga doalvume rievssatbivdiid, geat orro duottarstobus, meahccái meahccebiillain, birrasiid vihtta kilomehtera davábealde duottarstobu. Doppe deaivvadedje ovttain earáin rievssatbivdiin gii ii liikon go Johnsen geasehii olbmuid, ja čuoččuhii Johnsenis ii leat lohpi dasa, ja áittii váidit Johnsena politiijaide.

 

Áittii politiijaide váidit

Per Edvard Johnsen muitala son gal hirpmástuvai go amas olmmoš bissehii sin ja belkkii, ja logai su lobihuššame.

 – Lean máŋgalogi jagi láhčán gussiide bivddu ja dolvon sin meahccái, inge leat goassige vásihan bealkkahallat meahcis.

 

Gilvaleaddji

Johnsen lohká son ii dovdan amas olbmo, muhto su guossit dihte ahte lea Álttás eret.

 – Ipmirdin su fárus ledje njeallje eará bivdi, geaidda son lei oahpisteaddji, nu ahte mu mielas orui suhttame go eai beassan sierra doppe leahkit. Orui dego min háliideame eret guovllus, ja danne áittii váidit mu, lohká Johnsen. Son maid imaštallá jus dán guovllus, gos leat lahkosiin guokte duottarstobu, háliida sierra bivdit.

– Berrešii goit diehtit ahte dáppe leat eará bivdit, ja Finnmárku han lea stuoris, nu ahte ii leat bággu dáppe bivdit.

 

Luondduhálddašeapmi

Johnsen oaidná dan luondduhálddašeapmin doalvut meahccái gussiid, ja danne lohká iežas doalvut turisttaid veahá viidábut go dušše sáddet sin vácci meahccái duottarstobu rájes.

 - Rabas mađiijain in dárbbaš sierralobi, muhto mus lea sierralohpi gitta Rávttošvuopmái vuodjit, lohká son.

 

 

Lága siskkobealde

Boazopolitiijaid vuosttašpolitiijabálvá Torbjørn Berg lohká sii eai deaivva dakkár váttisvuođačuolmma nu beare dávjá.

 – Go olbmuid galgá geasehit fitnodatolis, de dárbbaša sierra persovdnageasehanlobi. In sáhte sihkkarit dadjat lea go Johnsen rihkkon lága vai ii, muhto nu movt mun jáhkán, de lea das guhte lágida idjadansaji gussiide, nu go hoteallat, de spiehkastit sii eret persovdnageasehangáibádusas. Johnsen lágida idjadansajiid ja lean oalle sihkar son guoská dan njuolggadussii, lohká Berg.

 

 

Fáddásánit
Ođđasat

På forsiden nå