Jienat lohkkojuvvojit dábálaččat lohkanmašiinnaiguin. Dál leat ovttas Našunála sihkarvuođaeiseválddiin (NSM) ja Politiijaid sihkarvuođabálvalusain (PST) árvvoštallan dihtorvuogádaga hearkivuođa, ja mearridan ahte buot stuoradiggeválgga jienat galget lohkkojuvvot maiddái gieđaiguin. Govven: Terje Pedersen / NTB scanpix

Buot jienastan­lihput galget gieđaiguin lohkkot

Gieldadepartemeanta čavge dihtorsihkarvuođa dán jagi válgga oktavuođas, ja gohčču buot suohkaniid lohkat stuorradiggeválgga jienastanlihpuid gieđaiguin dán jagi.

09:15 Čakčamánu 03. beaivi 2017
Ođastuvvon: 04.09.2017 - 10:04

Jienat lohkkojuvvojit dábálaččat lohkanmašiinnaiguin.

Dál leat ovttas Našunála sihkarvuođaeiseválddiin (NSM) ja Politiijaid sihkarvuođabálvalusain (PST) árvvoštallan dihtorvuogádaga hearkivuođa, ja mearridan ahte buot stuorradiggeválgga jienat galget lohkkojuvvot maiddái gieđaiguin.

 

– Galget sáhttit luohttit
– Ii leat mihkkege mii čujuha dan guvlui ahte muhtumat vigget váikkuhit válgačađaheami. Dattetge leat muhtun teknihkalaš čovdosat mat geavahuvvojit válggaid oktavuođas ožžon olu fuomášumi, maiddái riikkaidgaskasaš dásis. Dat iešalddis juo dagaha stuorát riskka, čállá departemeanta preassadieđáhusas.

– Dorvvolašvuohta ja luohtehahttivuohta leat guovddážis válgga čađaheami oktavuođas. Mii eat hálit diktit čuožžilit eahpádusa ahte sihkarvuohta ii leat vuhtii váldon válgga čađaheami oktavuođas. Jienasteaddjit galget sáhttit luohttit ahte válgaboađus lea riekta, lohká gielda- ja ođasmahttinministtar Jan Tore Sanner (Olgeš).

Sullii beali Norgga gielddain lohkkojuvvojit juo válgajienat gieđaiguin, ja doppe ii rievdda mihkkege dán mearrádusa geažil.  Gielddaide, mat mašiinnain lohket jienaid, mielddisbuktá ođđa mearrádusa veaháš lassibarggu.

Departemeanta namuha vel ahte Norggas vurkejuvvojit buot jienastanlihput maŋŋel válgga, nu ahte lea vejolaš ođđasit dárkkistit daid, jus šaddá dárbu.

(©NTB)

 

Fáddásánit
Válggat 2017

På forsiden nå