FeFo-cupas leat sihke vuoitit ja sii geat vuoittáhallet. Deanu ja Gidni TanaBK/NordkinnFK joavku vuoittáhalle HIF/Steinii. Govven: Silje Malene Varsi.

Vuoitit ja vuoittáhallit buohtalaga FeFo-cupas

Sullii 4000 nuora ledje čoahkkanan Barentshállii gilvalit gii lea buoremus čiekčat spáppa, ja lágideaddji lohká cupa mannan bures vaikke ledje guovttis geat gárte buohccivissui.

14:34 Skábmamánu 08. beaivi 2017

FeFo-cupa lágiduvvui Barentshállas Hessengas ja lea Girkonjárgga valáštallansearvi mii doaimmaha cupa. FeFo-cupa čállingotti Hanne Torgersrud lohká FeFo-cupa lágidemiid mannan bures, muhto leat maiddái leamaš muhtin čiekčit geat leat roasmmehuvvan ja gártan buohccivissui.

 – Lea okta čiekči gii lea doadján gieđa ja okta geas lea oalgedákti doddjon, lohká Hanne Torgersrud.

 

4000 nuora

46 joavkku leat čiekčan FeFo-cupas dán jagi.

 – Leat sullii 4000 nuora geat leat čiekčan dáppe mannan vahkkoloahpa ja sii bohtet sihke Oarje-Finnmárkkus ja Nuorta-Finnmárkkus. Mis leat maiddái leamaš joavkkut mat leat boahtán Ruoššas, dadjá son.

 

Doaibman bures

Girkonjárgga valáštallansearvi KIF lea mii lágida FeFo-cupa ja sis leat olu olbmot geat bargat vai nuorain galgá leat buorre dilli FeFo-cupas.

 – Mis leat hui ollugat geat leat bargan mannan vahkkoloahpa ja dat lea mannan bures. Oađđensajit skuvllain leat doaibman bures ja nuorat leat ožžon borramuša. Mii leat dušše maŋŋonan logi minuhta čiekčanáigi, nu ahte sáhtán dadjat ahte leat birgen bures, dadjá Hanne Torgersrud.

 

På forsiden nå