– Váttis goastadit buot vuoittuid

Lohke dat golmmas geat pálla saji ožžo. Sidjiide geigejedje sihke medálja, diploma, liđiid, ruhtavuoittu ja eambbo smávva vuoittuid. Illá goastadit visot mielde. GEAHČA VIDEO!

15:03 Njukčamánu 16. beaivi 2017
Ođastuvvon: 16.03.2017 - 15:03

Beaivvádat ja olu olmmoš toarggas go FL-500 oassálastit galge vuoittuid oažžut.

Oassálastit leat eret Norggas, Suomas, Hollánddas, Duiskkas, Englánddas, Skottlánddas ja Tjekkias, ja buot leavggat ledje oaidnimis Álttá guovddážis.

(Ášši joatká gova vuolábealde)


LEAVGGAT: Skuvlamánát gudde leavggaid mat ovddastit buot riikkaid. Govven: Inger Marita Bals

Ii ollen ruoktot juovlaherskkuid ráhkadit

Nannestad áhkku, Elisabeth Edland, ii dušše vuoitán FL-500, son šattai Norggameašttirin maid.

Vaikko ii leat vuosttaš geardi go vuoitá Finnmarksløpet, de gáibida olu hárjehallama go vuoitit áigu.

Danne lea olu áigi dán dálvvi mannan hárjehallamii, muohttagis dieđusge.

Muhto doppe gos Edland orru, doppe lea leamaš unnán muohta dán dálvvi, mii lea dagahan ahte son lea ferten vuolgit dobbelii hárjehallat.

Olu hárjehallamis fas váikkuhusat eará doaimmaide.

– Juovllaid ollejin maŋŋit ruoktot go ledjen ferten vuolgit dobbelii hárjehallat, mii dagahii ahte in ollen juovlaherskkuid ráhkadit. Lihkus ordnii mu guoibmi, Per Olav, sihke juovlabiepmuid ja ođđabeairuohtabiepmuid. Lean hui giitevaš, lohká hui duhtavaš Norggameašttir, Elisabeth Edland.

(Ášši joatká gova vuolábealde)


VUOITI: Elisabeth Edland hárjehallá nu olu ahte dat čuohcá eará doaimmaide nu mo juovlaávvudeapmái. Muhto dat soittii gánnihan go jo vuittii gilvvuid. Govven: Inger Marita Bals

Searvan 20. geardde

Áltálaččas, Harald Tunheimas, lei okta mihttu dán jagáš gilvui: čađahit Finnmarksløpet 20. geardde.

Dan son nagodii, ja vujii goalmmat sadjái.

Dan ovddas geigejuvvui sutnje liigeskeaŋka lassin, Finnmarksløpet govva.

(Ášši joatká gova vuolábealde)


20. GEARDDE ČAĐAHAN: Harald Tunheim lei dui duhtavaš go nagodii čađahit Finnmarksløpet 20. geardde dán jagi. Govven: Inger Marita Bals

Lea máŋga jagi áigi dán rájes Tunheim maŋemus čuoččui pálla alde Finnmarksløpet vuoitoseremoniijas, ja son lei ilus go beasai vásihit dan fas.

– Lea hui somá fas dás čuožžut, vaikko lea máŋga jagi áigi, de lean hui duhtavaš, dadjá Tunheim.

(Ášši joatká gova vuolábealde)


5. GEARDI: Trine Kristiansen Lyrek, Vidar Uglebakken ja Sølvi Monsen ožžo maid gova go serve 5. geardde dán jagi. Govven: Inger Marita Bals

Buohkaide diploma

Vaikko ruhtavuoitu ii lean buohkaide, de ožžo buohkat geat bohte molli FL-500 luohkás diploma.


ČALMMUSTAHTTE: 44 beanavuoddji bohte molli dán jagáš Finnmarksløpet 500 km luohkás. Govven: Inger Marita Bals

 

På forsiden nå