Vearroetahta lea gearggus almmuhit vearrologuid.
Skábmamánu 7. beaivvi almmuhuvvojit vearrologut. Vearroetáhta dieđiha ahte leat 4,8 miljovnna olbmo ja 317 000 fitnodaga vearrologut dál gárvásat, ja almmuhuvvojit.
Logut čájehit ahte lea sáhka 492 miljárdda ruvnnos maid bálkábargit, penšunisttat ja ealáhusat leat máksán vearu 2017:s.
317 000 fitnodaga fas leat máksán 81 miljárdda ruvnno vearu.
3,2 miljovnna olbmo leat ožžon ruovttoluotta vearus, ja 760 000 olbmo leat fas šaddan máksit, go leat máksán beare unnán vearu 2017:s.
Dán jagi rájes ii sáhte šat váidit jus vearru lea boastut gesson, dahje it leat goluid ožžon mielde iešdieđihanskovvái. Dál sáhttá golbma jagi maŋás divvut ieš dan mii lea boastut, dieđiha Vearroetáhta preassadieđáhusas.
