Politiijat leat ožžon cavgileami ovtta vihtanis gii lohka iežat oaidnán seksualálaš aktivitehta duorastat eahkeda Leavnnjas.
Politiijat leat ožžon cavgileami ovtta vihtanis gii lohka iežat oaidnán seksualálaš aktivitehta duorastat eahkeda Leavnnjas.
Badjel 20 jahkásaš nisu dieđihii mannan duorastaga ahte okta dievdu lea su veagalváldán biilabisánanbáikkis olggobealde Gaskaijarocka festiválašillju. Politiijat leat dahkan teknihkalaš iskamiid ja leat maid iskan báikki gos veagalváldin galgá leat dáhpahuvvon.
Vihtan
Dál dieđiha Porsáŋggu gieldda leansmánnii ahte okta nisu lea dieđihan iežat vihtanin áššis go navdá iežat oaidnán seksualálaš aktivitehta duorastat eahkeda, dan duođašta Porsáŋggu leansmánni Britt Solveig Olaussen «iFinnmark» áviisii. Ii okta ge leat vel váldon gitta dán áššis ii ge balahuvvon sivalažžan.
– Vihtan lea áican seksualálaš aktivitehta guovtti rávis olbmo gaskkas biilabisánanšilljus Gaskaijarockas duorastaga. Son lea muitalan dárkilit gos son lea dán áican. Dál mii áigut váldit oktavuođa nissonin gii lea váidán dáhpáhusa, nu ahte mii beassat čielggadit lea go seamma báikkis dáhpáhuvvon, vuoi lea go hupmu áibbas eará áššis dát, čilge Olaussen.
Ávžžuha váldit oktavuođa
Olaussen maid lohka ahte politiijat ain háliidit eambbo cavgilemiid áššis.
— Jus leat áican seksualálaš aktivitehta biilabisánanšilljus Gaskaijarockas maŋŋel diibmu 20:00 duorastat eahkeda, de mun ávžžuhan váldit oktavuođa politiijain, lohka leansmánni «iFinnmark» áviisii.
