-Almmuhus-
OĐĐASATSomby ja Eira virgái­biddjoba direktevra­virggiide

Somby ja Eira virgái­biddjoba direktevra­virggiide

-

-

Liv Inger Somby biddjo fásta virgái Sámedikki gulahallanstába ossodatdirektevran. Sara Inger Lisbeth Mina Eira biddjo fásta virgái Sámedikki bajásšaddan- ja oahpahusossodaga ossodatdirektevran.

Dan mearridii Sámedikki politihkalaš virgáibidjanlávdegoddi čoahkkimis duorastaga.

Liv Inger Somby (58) bargá dál allaskuvlalektorin journalistihkas Sámi allaskuvllas Guovdageainnus. Sus lea guhkes hárjáneapmi mediasuorggis, earret eará NRK Sámis, ja lea bargan mediasuorggis maiddái Ruoššas ja Ruoŧas. Somby lea Duohtavuođa- ja seanadankommišuvnna ja NRK sáddehatráđi lahttu ja jođiha sámi prográmmaráđi, mii árvvoštallá ja evaluere sámi prográmmafálaldaga NRK:s.

Sámediggi čállá preassadieđáhusas ahte sii leat hui duhtavaččat Liv Inger Somby virgáibidjamiin gulahallanstába ossodatdirektevra virgái.

– Su fágalaš duogáš, sámi servodatipmárdus ja hárjáneapmi máŋggajahkásaš journalistan ja mediaovddideaddjin Sámis, lassin su jođiheaddjehárjáneapmái iešguđet dásiin, lei mearrideaddjin válljejupmái. Dán virgáibidjama bokte oažžu Sámediggi čeahpes mielbargi geas lea buorre gelbbolašvuohta fágasuorggis ja dárbbašlaš jođihanhárjáneapmi, dadjá Sámedikki direktevra Inger Marit Eira-Åhrén preassadieđáhusas.

Statpedas Sámediggái

Sara Inger Lisbeth Mina Eira (45) bargá dál Statpedas seniorráđđeaddin. Son lea ovdal bargan earret eará Máze skuvllas oahpaheaddjin ja rektorin. Son lea mánáidgárdeoahpaheaddji, lea váldán lassioahpu, ja sus lea master erenoamášpedagogihkas.

Preassadieđáhusas dieđiha Sámediggi ahte Sámediggi lea maid hui duhtavaš Sara Inger Lisbeth Mina Eira virgáibidjamiin bajásšaddan- ja oahpahusossodaga ossodatdirektevran.

– Su máhttu oahpahussuorggis ja hárjáneapmi mánáidgárdesuorggis ja allaskuvlasuorggis lea leamaš dehálaš Sámediggái virgáibidjanproseassas. Sámediggi oažžu virgáibidjamiin kandidáhta gii dovdá bures ođđa oahppoplána barggu ja oahpponeavvoovddideami, mat leat guovddáš bargosuorggit Sámedikkis. Sávan sutnje buresboahtima Sámediggái ja illudan buori ovttasbargui, dadjá Mikkel Eskil Mikkelsen, gii lea leamaš doaibmi direktevran bajásšaddan- ja oahpahusossodaga direktevrra virgáibidjamis go direktevra lei inhabiila.

-Almmuhus-