Skuvla- ja hárjehallanáiggit galggašedje heivehuvvot nuoraid oađđindábiid mielde, oaivvilda professor.
Skuvla- ja hárjehallanáiggit galggašedje heivehuvvot nuoraid oađđindábiid mielde, oaivvilda professor.
Olbmuide lea dehálaš oađđit doarvái, dát guoská erenomážit nuoraide geat galget šaddat ja oahppat.
Dattege lea sihke ollesolbmuide ja nuoraide váttis nohkkat rievttes áigái.
– Livččii dehálaš láhčit árgabeaivvi nu ahte nuorat šaddet oađđit doarvái, lohká Bergena UNI Research dearvvašvuođa professor Mari Hysing.
Guhkes beaivvit ja oanehis ijat
Professor mielas leat nuoraid árgabeaivvit moaitinveara, erenomážit leat joatkkaskuvlaohppiin beaivvit mat eai heive nuoraid oađđindábiide.
Skuvlabeaivi álgá árat go ovdal, nuorain lea guhkin skuvlageaidnu ja hárjehallamat ja eará astoáiggedoaimmat leat menddo maŋŋit.
– Joatkkaskuvla oahppit dadjet ahte dárbbašivččii oađđit sullii 8,5 diimmu idjii, ja dat doallá deaivása. Dattege ođđet nuorat gaskamearálaččat guokte diimmu unnit juohke ija, lohká Hysing NTB ođasdoaimmahahkii.
Bija eret telefuvnna
Mátketelefuvdna, TV ja dihtor leat áigesuollagat.
Professor ipmirda ahte lea váttis bidjat dáid eret eahkedis, muhto son dattege rávve šearpmaid jáddadit diimmu ovdal nohkanáiggi.
– Ále váldde telefuvnna seŋgii, seaŋggas galgá oađđit, dadjá Hysing.
Váhnemat berrejit gohcit guhkit
Viidáset rávve Hysing ahte skuvlaoahppit barget ruovttubihtáid árrat ja ahte váhnemat ovttasráđiid gávnnahit goas nuorat eai šat beasa čálášit nubbi nuppiin.
– Váhnemat berrejit maid gohcit guhkit go mánát vai dihtet sihkkarit ahte nuorat stándejit nohkkat. Ollesolbmot fertejit maid leat buorit ovdagovat, danin berrejit sii maid jáddadit dihtoriid, TV ja telefuvnnaid áiggil. Sii fertejit čájehit ahte vuoruhit oađđima, loahpaha Hysing.
