Gávcci sámi giehtačeahpi leat hábmen tekstiillaid, maiguin áigot váldit stuorát oasi sámi designa suorggis. Prošeavtta vuolggaheaddji lohká dál áiggi dan dahkat, go designafitnodagat, main eai leat čanastagat sámi kultuvrii, váldet osiid sámi minstariin.
Gávcci sámi giehtačeahpi leat hábmen tekstiillaid main leat sámi govat ja hearvvat. Sii galget čájehit buktagiid Gøteborgas olles guovvamánu. Prošeavtta namma lea «Sápmi runt hörnet». Duojárat leat Ruoŧa ja Norgga beale Sámis eret.
Olggobeale fitnodagat váldet oasi sámi hámis
Prošeavtta vuolggaheaddji Maria Vinka čilge preassadieđáhusas ahte sámi duodji lea guhká bistán, ja leamaš alla dásis, muhto lea ain okta oassi mii ii leat ollis.
– Lea oalle dábálaš ahte designafitnodagat main eai leat čanastagat sámi kultuvrii, váldet osiid sámi minstariin ja čiŋain iežaset buktagiidda, lohká prošeavtta vuolggaheaddji, Maria Vinka.
Son oaivvilda ahte lea áigi sápmelaččain váldit stuorit oasi designasuorggis, ja leahkit eambbo oidnosis.
Gávcci giehtačeahpi
Maria Vinka lea giehtačeahppi, lea vázzán Design- ja dáiddaallaskuvlla Göteborgas. Prošektii lea ožžon doarjaga Göteborga suohkanis. Son lea bovden čieža eará giehtačeahpi Sámis, Ruoŧas ja Norggas, searvat su prošektii. Laila Brandsfjell, Sandra Blind, Ove Stødle, Johanna Huuva, Leila Nutti, Cecilia Unnes ja Majjen Ristiina Eira leat duojárat geat leat mielde su prošeavttas.
– Sámi giehtabarggut assosierejuvvojit dávjá árbevirolaš dujiin, mas leat árbevirolaš ávdnasat. Nuorra sámi giehtačehpiid gaskkas leat oallugat geat geavahit eará ávdnasiid ja vejolašvuođaid giehtabargguin, cealká preassadieđáhusas.
«Sápmi runt hörnet» -čájáhus rahppo guovvamánu 7. beaivvi ja bistá 26. beaivái.
