-Almmuhus-
-Almmuhus-
-Almmuhus-
OĐĐASATPolitiijat: 40 gillájeaddji Dielddanuori rohcošanáššiin

Politiijat: 40 gillájeaddji Dielddanuori rohcošanáššiin

-

-

60-jahkásaš dievdu lea áššáiduhtton go galgá rohcošan vuolleahkásaš mánáiguin. Politiijaid dieđuid mielde galget leat 40 gillájeaddji. 

Dievdu váldui gitta mannan juovlamánu, maŋŋel go soames cavgilii politiijaide. Ofuohta politiijat leat dutkan ášši dan rájes. 

Dál dieđihit politiijat ahte dutkamat leat čađahuvvon, ja ahte politiijaid juristtat galget dárkkistit ášši ovdal go sáddejit dan Nordlándda stádaadvokáhttii áššáskuhttimii.

 

Juristtat galget árvvoštallat áššáiduhttima

Vaikko leat 40 gillájeaddji áššis, de ii leat dievdu vuos áššáiduhtton rohcošan buot njealljelogiin.

– Go dutkamiin leat geargan, de galget juristtat árvvoštallat galgá go rievdadit áššáiduhttima, ja galgá go viiddidit dan, lohká dutkanjođiheaddji Ragnhild Normann NTB ođasfitnodahkii.

Son ii kommentere galle rohcošeami ovddas dievdu lea áššáiduvvan.

 

Ii loga diehtit

Go politiijat válde dievddu gitta, de áššáiduvai seksuála rohcošemiin, seksuála daguid ovddas vuollel 16-jahkásaš mánáin, ja seksuála loavkašuhtti dahje eará heivetmeahttun láhttema ovddas mánáin, dahje máná lahkosis. Dás lea eanaš sáhka nuorra bártniin.

Dievdu lea njealji gažadeamis čilgen iežas beali, ja biehttala ráŋggáštussivalažžan. Dutkanjođiheaddji dieđiha ahte dievdu ii loga diehtit manne dákkár áššis lea áššáiduvvan.

 

Giitet go leat muitalan

Politiijat leat odne čilgen ášši iežaset neahttasiiddus.

Doppe sii dieđihit ahte olu áššiin leat dáhpáhuvvan daid maŋemuš 40 jagi. Danne lea maid jáhkehahtti ahte olu áššit heaittihuvvojit go leat nu boarrásat.

– Muhto politiijat háliidit deattuhit ahte buohkat geat leat muitalan, leat leamaš veahkkin dán dutkamis, čállet politiijat iežaset neahttasiiddus. 

– Mii háliidit rámidit sin geat leat duostan muitalit politiijaide, go leat duostan, vaikko dat maid buvttii noađi. 

-Almmuhus-