Ohcejoga gielda lágida kulturvahku suoidnemánu 3.–9. beivviid. Ohcejogas, Njuorggámis ja Gáregasnjárggas, ja dan oktavuođas lea vejolaš vásihit sámi dovddus artisttaid lávddi alde.
– AMOC x Ailu Valle, Ánnamáret, Jalvvi Niillas, Yungmiqu, Laura Tapiola ja DJ Sunna Maaret. Musihka lassin festiválas earet eará gullat Inger-Mari Aikio divttaid, oaidnit Petteri Saario bagadallan Guovssahasaid ráppár – dokumentárafilmma, speallat gáddedoaškunspáppa ja beassat guldalit Teatteri Tie eallimáidnasiid, čállá Ohcejoga gielda astoáigečálli, Kaisa Tapiola-Länsman.
Lágideddjiid sániid mielde dáhpáhus lea nuvttá fálaldat, das giddejuvvo fuomášupmi sámekultuvrii. Tapiola-Länsman lea nuppát háve ordnemin kulturvahku.
– Lean hui movtta das, ahte mii leat fidnen kulturvahku ordnemiidda mielde olles gieldda: servviid, fitnodagaid, ovttaskas olbmuid ja eambbo go ovtta ruhtadeaddji. Okto mii eat sáhtáše ná viiddis kulturvahku ordnet. Dál beare doaivut vahku áigái buori dálkki, vai Ohcejohka beassá čájehit buoremus beliid! dadjá son.
