-Almmuhus-
KULTUVRANuorra dáiddár hábmen Skábmagovaid plakáhta

Nuorra dáiddár hábmen Skábmagovaid plakáhta

-

-

Nuorra sámi dáiddár lea hábmen Skábmagovaid ođđa plákahta. Lea anárlaš dáiddar Sunna Kitti, gii hábmii maiddái jagi 2017 festiválaplakáhta.

Skábmagovaid ođđa plakáhta vuođđuduvvá «Eugène Delacroixa La Liberté guidant le peuple» dávvalii ja dan njunnošis lea «Sameblod» -bagadalli Amanda Kernell, dieđiha Skábmagovaid lágideaddji pressadieđáhusas.

– Plakáhta jurddan lea čalmmustahttit filmma mearkkašumi – mo filmmain sáhttá muitalit sámekultuvrras ja man mearkkašahttin filbma lea šaddan eandalii dán ođđaáiggis, masa gullo, ahte dovddut ja miellagovat stivrejit olbmuid vuogi válljet ja beroštit áššiin. Eamiálbmogiid filbma lea dehálaš bargoneavvu, mainna sáhttá vurket ja ovddidit iežašet kultuvrra hutkkálaččat. Dainna sáhttá maiddái rievdadit vahátlaš ovdagáttuid, mat leat ain eallimin, muitala Skábmagovaid doaibmajođiheaddji, Sunna Nousuniemi preassádieđáhusas.

 

Kernell njunnošis

Son joatká:

– Plakáhta njunnošis lea bagadalli Amanda Kernell, go mii háliideimmet ávvudit Sámevara meneštumi ja giitit Kernella ja olles Sámevarra-joavkku fiinna barggus, dadjá son.

 

Davvi-Amerihká eamiálbmogiid filmmat guovddážis

 


Skábmagovaid doaibmajođiheaddji, Sunna Nousuniemi. Govven: Ville Riiko Fofonoff/Skábmagovat

Skábmagovat-festivála lágiduvvo 20. geardde Anáris 25.-28.1.2018 ja boahttevaš festivála guovddážis leat Davvi-Amerihká eamiálbmogiid filmmat.

Davvi-Amerihkká vuhtto maiddái Skábmagovaid ođđa plakáhtas.

– Standing Rock Dakota Access -oljobohcci vuostálastin loktii eamiálbmogiid rivttiid bealušteami maiddái váldomedias oidnosii. Mis dáppe Sámis fas go Ellos Deatnu -joavku vuođđudii moratorio Čearretsullui ja vuostálasttii nu ođđa Deanu soahpamuša. Dát guktot leaba oidnosis min plakáhtas ja mii doarjut goappášagaid, Ellos Deatnu- ja Standing Rock-lihkadusa, cealkká Nousuniemi preassadieđáhusas.

 

Háliidit doarjut

– Lei maiddái midjiide hui dehálaš, ahte min plakáhta hábme báikkálaš dáiddár. Mii háliidit doarjut ja buktit oidnosii min čeahpes nuorra sámidáiddáriid nu go Sunna Kitti, muitala Nousuniemi.

-Almmuhus-