-Almmuhus-
KULTUVRANKD fylkafestivála čievččastuvvui johtui

NKD fylkafestivála čievččastuvvui johtui

-

-

NKD fylkafestiválii, mii dán vahkkoloahpa lágiduvvo, bohtet olu nuorat. Duorastaga juo lei kick-off konsearta, ja ISÁK ja NorthKid joavkkut čievččastedje festivála johtui somás eahkediin. 

<!–*/

/*–>*/

Dán vahkkoloahpa lágiduvvo NKD fylkafestivála Álttás.

Lea stuora dáhpáhus, masa badjel guoktečuođi oasseváldi servet iežaset čehppodagain.

– Mis leat vissa 70 iešguđetlágan ovdanbuktimat lávddi alde – nu go ovdamearkka dihte lávlun ja filbma. Dasa lassin leat vel sullii 20 nuorra, čeahpes dáiddárat, geat bohtet čájehit dáidagiiddiset, muitala prošeaktajođiheaddji Benedicte Lyng.

 

Álggahankonsearta NorthKidain ja ISÁKiin

Festivála álggahuvvui duorastaga kick-off konsearttain.

Eahket šattai ealasin buohkaide geat bohte, go sihke NorthKid nammasaš joavku ja ISÁK-joavku čuojahedje.

Somás ja gelddolaš eahkediin besse nuorat álggahit vahkkoloahpa – mii ii šatta unnit gelddolaččabun.

– Finnmárkkus leat hirbmat guhkes gaskkat, ja nuorat, geat servet fylkafestiválii, leat mátkkoštan guhkás. Mii háliideimmet lágidit dákkár kick-off konseartta buohkaide, vai lea hui somás álgu dán jagáš fylkafestiválas, lohká Lyng.

 

Buohkat ovddastit ruovttusuohkana

Guovvamánus besse Ávviris lohkat ahte Guovdageainnu NKD:i serve nu čeahpes oasseváldit ahte jury sáddii buohkaid viidáset.

Dál leat ge Anne Majjen Buljo, Anne Madeleine Eira Hætta, Jon Lennart Turi, Aina Emilie Siri Bals, Thea Marja Eria, Mia Bongo Norvoll, Sunna Mari Joakinsen, Mathis Eira, Elina Johansen Iljas, Áslat Issát Eira ja Ole-Gabriel Buljo Álttás juogadeame áŋggaštusaset go leat ovddasteame Guovdageainnu.

 

Olu nuorra lágideaddjit

NKD lea nuoraid váste, ja prošeaktajođiheaddji deattuhage ahte sii geahččalit buot buoremus lági mielde láhčit dili nu ahte nuorain galggašii leat somá ja ahte sii besset čájehit taleanttaideaset.

Dán jagi lea erenoamáš ahte ii leat biddjon earri galle nuorra lágideaddji galget leat mielde lágideame NKD fylkafestivála. Dan sii leat dahkan juste fal nuoraid dihte.

– Čađat leat mis nuorat guovddážis, ja lea sin váste go mii lágidat dáid doaluid. Dán jagi leat erenoamáš olu nuorat mielde lágiideamis – ja dat lea ge juste dan dihte ahte sii galget beassat oahppat lágidit festivála. Dat han lea sin festivála, ja sii galget dasa beassat dovdat eaiggátvuođa.

-Almmuhus-