Dál, go Guovdageaidnu ii leat šat seamma divišuvnnas go Nordlys, ja čiekčan mii lea gohčoduvvon «Slaget om vidda» dahje «Duoddara čiekčamat» ii leat šat, de lea čuožžilan ođđa ránnjáčiekčan. Dál lea Deatnu beassan bajás njealját divišuvdnii ja de han lea lunddolaš ahte spábbačiekčan mearrida geat šaddet «Deanučázádaga gonagassan».
Nordlysa hárjeheaddji Rasmus M. Somby dadjá iežas vuordit garra čiekčamiid joavkku vuostá man vuostá ii muitte goas Nordlys maŋemus lea čiekčan.
– Mii mannat šilju ala dainna jurdagiin ahte mii áigut vuoitit čiekčama. Mun vuorddán garra čiekčamiid ja Deatnu lea čájehan ahte sis lea buorre joavku ja ahte sáhttet časkit vaikko gean, muhto dan gal leat mii ge, dadjá Somby.
Lossa álgu
Nordlys lea čiekčan njeallje čiekčama, golmma vuosttaš čiekčamii sii fertejedje mátkkoštit, njealját čiekčan lei vuosttaš ruovttučiekčan, Sállan Glimt vuostá. Nordlysa hárjeheaddji muitala ahte lea leamaš lossa álgu, muhto son oaidná ovdáneami čiekčamis čiekčamii.
– Mis leat leamaš veaháš hástalusat dán rádjái, ja lea váttis beassat eret dain. Lea dego livččii lossat vuolgit johtui, muhto dasa gávdno čoavddus ja dat lea eambbo ja garraseappot hárjehallat, čilge Somby.
– Buorre mokta joavkkus
Nordlys lea báhčán vuosttaš moala sihke Hif/Stein, Guovžajávrri ja Sállan Glimt vuostá, muhto čiekčamat leat jorgaluvvon ja Nordlys lea vuoittáhallan. Hárjeheaddji muitala ahte joavkkus lea buorre mokta, vaikko eai leat nagodan doalahit iežaset vuoittu bealde gitta lohppii.
– Mis lea hui buorre mokta sihke ovdal ja maŋŋel čiekčamiid, ja dan mun vuorddán ge. Ja go mokta lea buorre, de gal sáhttet čuoggát maid boahtit, go dalle han lea buoret doaivva vuoitit. Ii go son dál luovvanišgoađe, go juohke čiekčan addá buoret ja buoret dovddu ja jáhku, čilge Somby ja lohká dehálažžan beassat ovddabeallái psykologalaččat čiekčamis.
Ollu rievdadusat
Dasa lassin go ahte Rasmus M. Somby lea fas váldohárjeheaddji, de leat Nordlysas eambbo rievdadusat dán áigodaga.
Veahkkehárjeheaddjit dán jagi leaba Rolf Gunnar Mienna ja Hans Arild Holmestrand. Čikčiid bealis leat maid rievdadusat dán jagi. Tom Erik Biti, gii lei kapteaidna ollu jagiid, lea molson joavkku, ja son čiekčá dál BUL ovddas. Dasa lassin leat dehálaš čiekčit nu go Mads Petter Utsi, Kai Espen Balto ja Lásse Biti molson joavkku, ja muhtin earát ges leat heaitán dan rájes go Somby maŋemus lei hárjeheaddji.
– Diehttelasat buktá dat hástalusaid midjiide go mii massit diekkár čikčiid. Dasa lassin han leat vel muhtimat geat eai leat joatkán spábbačiekčamiin, dadjá Somby.
Ođđa čiekčit
Dat ahte ođđa kapteaidna, Jon Andreas Rognerud Eira, lea roasmmehuvvan ii ge dáidde gearggus čiekčat ovdal go mihcamáraid rájes, dagaha dili váttisin. Rognerud Eira lea leamaš dehálaš čiekči Nordlysii dan rájes go bođii ruovttoluotta Álttás. Guovdageainnu diimmá hárjeheaddji, Isak Ole Hætta, maid rámidii Eira ja dajai ahte son lei erohus joavkkuin, maŋŋel go joavkkut deaivvadedje čakčat.
– Jon Andreas lea dál fas lášmmohallame maŋŋel go lea leamaš roasmmehuvvan. Jus dál lea mihcamáraid rájes mielde juobe beaŋkkas ge, de lea buorre. Muhto in jáhke su ollásit mielde ovdal go suoidnemánu rájes, dadjá Somby ja muitala ahte soitet ođđa čiekčit boahtime Nordlysii.
– Mii leat ožžon Ole Johnny Jansena Guovdageainnus ja Nils Máhtte Rognerud Eira Billávuonas, ja leat vel vuordime eará ođđa čikčiid. In hálit muitalit namaid vuos, muhto mii leat goit vuorddašeame, muitala Rasmus M. Somby.
Vulget Kárášjohkii vuoitit
Deanu joavku, mii diibmá beasai bajás 4. divišuvdnii, ii leat ovdal deaivvadan Nordlysain ráidočiekčamis. Dál leat sii čiekčan golbma čiekčama 4. divišuvnnas ja sii leat álgán bures. Vuosttaš čiekčamis vuoittáhalle Girkonjárgii 5-0, maŋŋel dan sii časke Honnesvági 3-2 ja čikče dássálaga, 2-2, Sállan Glimtain.
Dál sii vulget Kárášjohkii vuoitin dihte.
– Čiekčan šaddá hirbmat gelddolaš ja mii vuolgit Kárášjohkii vuoitin dihte. Čiekčan šaddá gelddolaš ja dasa mii gal illudit, dadjá Deanu hárjeheaddji Ronald David Helander.
Nuorra joavku
Deatnu lea sullii seamma dilis go Nordlys. Sis leat ollu nuorra čiekčit ja sullii bealli joavkkus leat 15- ja 16-jahkásaččat, dasa lassin go leat moadde čiekči geat leat badjelaš 30-jahkásaččat. Eanemus hárjánan čiekči lea Ánte Smuk, gii lea čiekčan sihke Guovžajávrri ja Norild ovddas alit dásis go 4. divišuvnnas.
– Mis váilot čiekčit geat leat birrasii 20-jahkásaččat. Oažžu nu lohkat ahte mis leat hui nuorra ja oalle hárjánan čiekčit joavkkus. Ánte Smuk lea vissa áidna čiekči mis gii lea finadan goalmmát divišuvnnas, dadjá hárjeheaddji ja joatká:
– Muhto čiekčan lea goit hirbmat gelddolaš. Lea bajit oassi mii deaivvada vuolit osiin Deanus ja 90 minuhta spábbačiekčan dat čájeha movt de manná čiekčamiin.
– Ii leat dušše viežžalit
Nordlys čiekči Jovnna Ivvár Guttorm duođašta ahte joavkkus lea buorre mokta ja ahte sii ovdánit čiekčamis čiekčamii. Seammás son vel sáddesta váruhusa ránnjáide Deanus.
– Mii leat hállan ahte mis galgá leat somá sihke šilju alde ja hárjehallamis. Eat galgga smiehttat nu ollu dan vuoitima birra, ja leat baicca hukseme joavkkus morála dál. Mii ovdánit čiekčamis čiekčamii ja nu go oainnát, de leat mis ollu čiekčit hárjehallamis, ná máŋggas eat lean diibmá. Mis lea dál viehka buorre mokta joavkkus, muitala Guttorm ja loahpaha:
– Dáppe gal ii leat dušše viežžalit čuoggáid, dat gal lea sihkar. Albma čiekčama gal ožžot, Deatnu, go bohtet.
Roy Arthur Olsen
roy@avvir.no
