Finnmárkkus lea buot alimus buozalmasvuođajávkan Norggas, mii lei 2014:s badjel 440 000 bargobeaivvi ovtta jagis go bargit eai lean barggus.
Finnmárkkus lea buot alimus buozalmasvuođajávkan Norggas, mii lei 2014:s badjel 440 000 bargobeaivvi ovtta jagis go bargit eai lean barggus.
– Orru čájeheame ahte lohku lea badjelmearálaš allat. Eanet bealit fertejit dál bargat nu ahte olbmot bohtet jođáneappot fas bargui, lohká NAV Finnmárkku direktevra, Nina Haugen.
Árabut oažžut bargi fas bargui
Haugen čujuha álbmotoadjolágas leat čielga gáibádusat ahte buohccindieđihuvvon olbmot galget fas bargagoahtit gávcci vahkku maŋŋel, jus eai leat erenomáš medisiinnalaš sivat manne ii sáhte bargui máhccat.
Direktevra dieđiha dál ahte NAV áigu árabut geahččat buozalmasvuođajávkamiid ja árvvoštallat lága gáibádusaid leat go doaimmat čađahuvvon.
– Dat máksá ahte buohccindieđihuvvon olmmoš galgá geahččalit fas boahtit bargui nu jođánit go vejolaš, ja gávcci vahkku rádjái leat doaimmas barggus, muitala Nina Haugen.
Sáhttá čuohcat bálkái
Haugen deattuha ahte NAV áigu dárkilit čuovvut mielde ja sáhttit bissehit buozalmasruđaid, jus eai leat medisiinnalaš sivat jávkamii.
– Ii leat sáhka olbmuin váldit rivttiid geain lea dárbu buohcandieđáhussii, ii ge leat nu ahte galgat geahččalit dárkkistit doaktáriid medisiinnalaš árvvoštallamiid. Mii áigut dušše čielga gáibádusaid addit doaktáriidda, bargoaddiide, bargiide ja NAV:i, dadjá direktevra.
