Dál sáhttet mánát 1. gitta 7. luohkkái válljet lohkat sámegillii muitalusaid digitála lohkankampánjjas Sommerles.no.
Geassemánu 1. beaivvi álggahuvvo dán jagáš Sommerles.no-kampánja, mii bistá gitta borgemánu 31. beaivái. Sommerles.no lea bures lihkostuvvan máŋggaid jagiid, ja diibmá oassálaste badjel 164 000 máná. Kampánjja mihttu lea movttiidahttit mánáid lohkat nu olu go oba nagodit ge olles geasseluomus. Vuosttaš geardde leat muitalusat jorgaluvvon golmma sámegillii, Sámedikki doarjagiin.
Dál besset riikka girjerádjosat ávvudit ja čalmmustahttit maiddái sámi mánáidgirjjálašvuođa skuvlamánáide lohkankampánjja oktavuođas.
– Lean ilus go sáhttit váikkuhit dasa ahte sámi oahppit geat leat mielde kampánjjas besset lohkat iežaset gillii, ja ahte sámi mánáidgirjjálašvuohta eanet čalmmustahttojuvvo buot skuvlaohppiide geat servet, dadjá sámediggeráđđi Maja Kristine Jåma (NSR) preassadieđáhusas.
Mii lea Sommerles.no
Sommerles.no lea digitála lohkankampánja Sommerles.no neahttasiiddus.
Mánát ráhkadit profiilla, dieđihit dohko buot maid lohket kampánjaáigodagas ja čogget čuoggáid juohke lohkkon siiddu ovddas.
Čuoggáid lassin sáhttet mánát oažžut digitála vuoittuid ja bivnnuhis vuoittuid maid sáhttet girjerádjosis viežžat.
Mánát besset lohkat muitalusa maid girječálli Mari Moen Holsve lea čállán erenoamážit kampánjja várás.
Sommerles.no lea mánáide 1. -7. luohkkái ja bistá geassemánu 1.b. rájes borgemánu 31.b. rádjái.
Vestfold ja Telemark fylkesbibliotek ja Snuti AS leat ovdánahttán Sommerles.
Gáldu: Sámediggi
Otne rahpandoalut Hápmiris
Julevsámi guovllus Hápmiris lágiduvvojit odne, geassemánu 1. beaivvi Sommerles 2022 rahpandoalut buot 1.-7. luohkáide suohkanis. Sommerles-girječálli Mari Moen Holvse boahtá rahpandoaluide Hamsunguovddážis Presteidsas Hápmiris. Kampánja rahpan ávvuduvvo jitnositlohkamiin julevsámegillii.
