-Almmuhus-
KULTUVRALiet International lágiduvvo Guovdageainnus beassážiid

Liet International lágiduvvo Guovdageainnus beassážiid

-

-

​Liet International 2017 lea oassi Davvi-Eurohpá stuorámus sámi festiválas, Sámi beassášmárkaniin ja Sámi Grand Prixas. Dat lágiduvvo cuoŋománu 13. beaivvi 2017 Guovdageainnus Davvi-Norggas.

Liet International šadda oassin doaluin mat lágiduvvojit jahkásaččat beassážiid áigge Guovdageainnus.

– Sihke Sámi Grand Prix lágideaddji Sámi Musihkkafestivála ja Liet International ásahusa stivra leat hirbmat duhtavaččat vejolašvuođain ahte Liet International šaddá oassin stuorát lávddis, ja illudit doaluide, čállet sii preassadieđáhusasteaset.

 

Skilleduorastaga lágidit

Liet International lávlungilvu lágiduvvo skilleduorastaga Báktehárjjis Guovdageainnus.

«Call for songs», ođđa lávlagiid almmuhit Liet International 2017 váste, lea dál almmolaččat rahppojuvvon.

Musihkkárat miehtá Eurohpá, geat lávlot regionála- ja minoritehtagillii, sáhttet ođđajagemánu 30. beaivvi rádjái ohcat beassat oassálastit Liet International 2017:s. 

– Sihke Liet 2016 vuoiti ja Sámi Grand Prix 2016 vuoiti leaba juo kvalifiseren iežaska Liet International 2017 gilvui, gávcci eará válljejuvvojit maŋŋel go sáddejit sisa musihkaset, čállet lágideaddjit.

 

Davvi-Hollánddas álggahuvvon

Frisalaččat (Davvi-Hollánddas) álggahedje lávlunfestivála regionála- ja minoritehtagielaid váste, Liet International, ja lágiduvvui vuosttaš geardde Friesland oaivegávpogis Ljouwert/Leeuwardenis.

2006 rájes lea festivála mátkkoštan birra Eurohpá ja 2008 rájes Eurohpáráđi suodjalusa vuolde.

– Liet International geasuha juohke jagi media beroštumi BBC rájes Al Jazeerai ja lea šaddan okta dain stuorimus dáhpáhusain ovddidit minoritehtagielaid, čállet lágideaddjit. 

2014:s lágiduvvui dán rádjái maŋemus Liet International Oldenburgas Davvi-Duiskkas. 

– Sámediggi addá stuorámus oasi ruhtadoarjagis doaluide. Lágideaddjit leat hui giitevaččat dan ovddas, čállet sii vel loahpas.

 

 

-Almmuhus-