Olles máilmmis lea rievdan dilli koronavirusa geažil, ja dál hástala ISFI Internašunála Sámi Filbmainstituhtta filbmadahkkiid ráhkadit oanehisfilmmaža dán dili birra.
Internašunála Sámi Filbmainstituhtta hástala sámi filbmadahkkiid ohcat duhtadeami ja ráhkadit filmma filbmaráiddožii mii almmuhuvvo ISFI rávdjenbálvalusas Sápmifilm:as, mas fáddán lea “Oru lea buoret go jođi”.
Amas dilli
Internašunála Sámi Filbmainstituhtta almmuha 30.000 NOK doarjaga Sámi filbmadahkkiide ráhkadit muitalusaid dán ođđa dilis. Olles máilbmi lea amas dilis go COVID-19 njoammodávda lea nuppástuhttán buohkaid eallima.
– Mo filbmadahkkit sáhttet govvidit dán ođđa dili? Sii sáhttet ráhkadit filmma váikko man birra, ovdamearkka dihte makkár drámá min eallimis gávdno dán dilis dahje makkár hástalusat leat čuožžilan, čállá ISFI preassadieđáhusas.
Filbmadahkkit sáhttet ohcat doarjaga maŋimustá bearjadaga 24. cuoŋománu 2020 oanehisfilbmii, man guhkkodat lea eanemustá 3 minuhta. Oanehisfilbmaráidu almmuhuvvo ISFI Sapmifilm-rávdnjenbálvalusas.
