-Almmuhus-
VALÁŠTALLANIL Nordlys lágidii minuktasaš jaskesbottu muitun Johan Mikkel Buengii

IL Nordlys lágidii minuktasaš jaskesbottu muitun Johan Mikkel Buengii

-

-

IL Nordlys gudnejahtii gaskavahkku eahkeda minuktasaš jaskes muitobottuin Johan Mikkel Bueng Niitoguolbanis, go deaivvadedje Porsáŋggu spábbačiekčanjoavkkuin. (Geahča vulogeahčen áššis filmma muitobottus.)

Johan Mikkel Bueng jámii mannan vahkkoloahpa, go lei Bodenis, Ruoŧas, gos lei mielde doalvegilvvuin. Johan Mikkel Bueng lei ge olmmoš geas lei stuorra beroštupmi Sámi valáštallamii, nu ahte su namma lea áiggiid čađa oidnon iešguđetlágan valáštallamiid oktavuođas. 

 

Spábbačiekčamii lei sus stuorra beroštupmi, nu ahte son áŋgirušai viššalit earret eará IL Nordlys doaimmain. 

IL Nordlys A-spábbačiekčanjoavku doalai ge gaskavahkku eahkeda minuktasaš jaskesbottu muitun Johan Mikkel Buengii, go deaivvadedje Porsáŋggu joavkkuin ruovttušiljus. Ovdal čiekčama čálii IL Nordlys iežaset rabas Facebook-siiddus earret eará čuovvovaččat:

«Lávvardaga 5/8-17 oaččuimet dieđu ahte Johan Mikkel Bueng lea vádjolan. Mii válddiime jápmasága vuostá lossa morrašiin. Bueng lea leamaš resursan searvvis 20 jagi, jus vel ii guhkit. Son vuojáhalai min miehtá Finnmárkku biillain ja bussiin, ja sáhtii maid girdiin doalvut spilláriid». 

 

– Veahkkás ja liekkus olmmoš

Gaskavahkku čiekčamii ledje boahtán ollu olbmot. Goappašat joavkkut čikče dán čiekčama morašbáttiiguin mat ledje gieđa birra. IL Nordlys A-joavkku hárjeheaddji Rasmus Somby lohká maŋŋel čiekčama ahte sidjiide lei áibbas lunddolaš doallat minuktasaš muitobottu.

 

– Juhán Mihkkal lei álot min joavkku lahka, nu ahte aniimet su árvvus. Son han lei hui veahkkás ja liekkus olmmoš, nu ahte su maŋis báhcet ollu buori muittut, lohká Rasmus Somby.

 

Su mielas šattai minuktasaš muitobottoš alla árvosaš muittašeapmi buot dan maid Johan Mikkel Bueng lea bargan IL Nordlys ovddas. Čiekčamiid bottus čuojahuvvui ge «Gabriels Sång» mii heivii bures dán čiekčamis.


– ÁLOT LEI LAHKA: – Juhán Mihkkal lei álot min joavkku lahka. Su maŋis báhcet ollu buori muittut, lohká IL Nordlys spábbačiekčanjoavkku hárjeheaddji Rasmus Somby. Govva: Inga Marie Guttorm

 

Beroštii eará valáštallamiin

Johan Mikkel Bueng lei maid áŋgir eará valáštallamiin. Nu go ovdamearkka dihte sis-bandy valáštallamis. Ovtta gaskka lei son maid áŋgiris heargegilvvohalli, ja 2007:s lei ge mielde álggaheame Sámi Heargevuodjin Lihtu, mii dál lea Norgga beale stuorámus heargesearvi. 

Das maŋŋel go heittii herggiiguin, de son álggii gilvvohallat heasttaiguin. Son huksii ieš ovttas vehkiiguin stálja iežas báikái Báhkiljohkii mas dál lea namma «Stall Bueng». 


HEARGEGILVVOHALLI: Johan Mikkel Bueng lei maid heargegilvvohalli ovtta gaskka. Dá jagi 2007:s ovttain iežas gilvoherggiin. Vuorkágovva: Josef Isak Utsi
 

 

Heastagilvvohalli

Johan Mikkel Bueng lei mielde ásaheame Kárášjoga Doalvesearvvi 2012:s, ja 2015 beassážiid lei son earret eará njunnošis lágideame heastagilvvuid «Jiekŋagilvvu» Kárášjoga alde. 

Son lea birgen bures heasttagilvvuin gitta dassážii go vádjolii, nu ahte dan olis lei maid su namma dávjá oidnosis. Maŋemus áiggi son geavahii ollu áiggi heastagilvvuide, sihke Norggas ja Ruoŧas. 


HEASTAGILVVOHALLI: Johan Mikkel Bueng heasttain Royal Behaviour 2013:s. Vuorkágovva: Anne Rasmus

 

Vuite

Johan Mikkel Bueng -rohkki bárdni, Nils Mikal, bođii loahpas čiekčamii šilju ala. Son lei mielde go Nordlys bážii maŋemus moala dán čiekčamis, go son sáddii spáppa John Jr. Eirai gii nahkehii spáppa Porsáŋggu mollii. Loahpaboađusin šattai ge 4-2. 

Hárjeheaddji Rasmus Somby lohká ahte vuosttaš vuorus rahče sii, go eai orron jurdagat mielde.

– Leimmet čađa beare maŋŋit jođus, nu ahte ii orron jurdagat doaibmame. In dieđe juste manne lei nu. Nuppi vuorus lei joavku arvat buoret go beasaimet veahá bottus háleštit, muitala Somby.

Dál lea ge Nordlys guđat sajis tabeallas, ja goalmmát joavkku ja Nordlys eai earut go golbma čuoggá, nu ahte sii leat njunnošiid searvvis ráidočiekčamis.

Johan Mikkel Bueng hávdáduvvo Kárášjogas borgemánu 17. beavvi. Son jámii 54-jahkásažžan, ja sus báhce eamit, mánát ja mánáidmánát.

-Almmuhus-