-Almmuhus-
OĐĐASATHelikopter gahčai Báidáris: Duođaštit njealjása duššan 

Helikopter gahčai Báidáris: Duođaštit njealjása duššan 

-

-

Bearjadaga eahkedis vurde Bådådjos Amerihká suodjalushelikoptera seaivut ovdalaš diibmu 18, muhto go ii ollen dan áigái, de dieđihedje helikoptera láhppon ja ohcanákšuvdna biddjui johtui. Lávvordaga duođaštit ahte dan njealjása geat ledje girdis, leat duššan.

– Politiijat leat dán ija sullii diibmu 01.30 ollen lihkohisvuođabáikái. Dađi bahábut duođaštit dál ahte dat njealjis geat ledje girdis leat duššan. Dán rádjái dihtet politiijat ahte sii ledje amerihkkálaččat, lohká Nordlándda politiijaguovllu operašuvdnajođiheaddji Ivar Bo Nilsson preassadieđáhusas lávvordatiđit diibmu 08.30.

Suodjalus addá dieđuid lagamuččaide ja čuovvola vehkiin.

– Politiijat leat álggahan dutkama ja leat dieđihan Havariijakommišuvdnii. Báikkis lea hirbmat heajos dálki nu ahte leat loahpahan barggu lihkohisvuođabáikkis, muhto politiijat jotket bargguin go firtegoahtá, lohká Nilsson.

Politiijat dieđihit ahte eai leat eanet dieđut dán áššis dál.

GAHČÁI: Dakkár Osprey girdi gahčai bearjadaga Sáltoduoddarii. Govven: Tiril Haslestad / Forsvaret / NTB
GAHČÁI: Dakkár Osprey girdi gahčai bearjadaga Sáltoduoddarii. Govven: Tiril Haslestad / Forsvaret / NTB

Lihkohisvuođa dáhpáhus

Ledje njeallje suodjalusbargi hárjehallame V-22 Osprey girdiin mii gullá Amerihká suodjalussii, ja leat mielde Nato-hárjehallamis man namma lea Cold Response. Sii galge seaivut veahá ovdal diibmu 18. Girdi dieđihuvvui láhppon diibmu 18.26 go ii lean seivon nu go plánejuvvon.

Diibmu 21.17 gávdne báikki gosa helikopter gahčai. Lei Sea King-helikopter masa bođii diehtu heahterusttega bokte, dieđihit Nordlándda politiijat.

– Gádjunveahka lea lahkosis, muhto báikái lea hirbmat váttis vánddardit. Dasa lassin lea stuora uđasvárra, ja oaidnit dađistaga ahte fertet árvvoštallat movt galgat joavdat dan báikái gosa girdi gahčai. Lea seavdnjat ja lea hirbmat borga, lohká politiija akšuvdnajođiheaddji Alexander Sjøvold NTB:i.

Vihtta Rukses Ruossa skutera leat ovttas politiijaiguin manname skuteriiguin báikái. Politiijat leat ásahan  doaibmaguovddáža lihkohisvuođas Trones skuvlii Báidáris. 

-Almmuhus-