Oktiibuot 115 heaibu deaivvadedje Deanus go doppe lágiduvvui internašunála heaibungilvu, sihke stuorráide ja smávváide.
Heaibunsearvi Deanus lágidii TanaMatch, internašunála heaibungilvvu oktanuppelogát geardde mannan lávvordaga, golggotmánu 6. beaivvi.
Dohko čoahkkanedje oktiibuot 115 heaibu mat bohte sihke Norgga ja Ruošša bealde.
Našuvdnakámpa
Ovdal heaibungilvvu lágiduvvui našuvdnagilvu gaskal Norgga ja Ruošša. Boađus das šattai Norga – Ruošša 3-16.
Das ledje Leila Ghourli, Synne M. Haagensen ja Abdullah Abdo, buot gullevaččat BK Tanai, geat vuite Ruošša vuostá. Leila, dušše 12-jahkásaš, nagodii vuoitit iežas boarrásat vuostálasti vuostá, gii lea eret St. Petersburgas.
– Lei albma rahčanheaibun man vuittii, muitala Frode Gundersen preassadieđáhusas.
TanaMatch
32 luohkás vuittii Ruošša 27 dain. Das ledje dušše vihtta Norgga luohkkávuoiti: Birk Helmer Soelberg (Tromsø BK), Ian Eriksen (Vadsø AK), Hedda Andreassen (AK-54), Abdullah Abdo ja Artor Hagerup.
– Norgalaččat leat liikká heibon bures ruoššaid vuostá. Sáhtán namuhit Lars Sandal Olaussen, gii čájehii olu buori heaibunránus. Lars bođii nubbin iežas luohkás, muitala Gundersen.
Ilya Novozhilov, gii lea Murmánskkas eret, šattai buoremus heaibun, Ekaterina Boitseva, Tichvinis eret, šattai fas buoremus nieidaheaibun. Buoremus joavkun šattai Olimp Arkhangelsk, Murmánska nubbin ja Mosshor goalmmádin. Buoremus Norgga joavku šattai BK Tana viđádin.
Buohkat vuoitit
BK Tana nuoramus heaibut birgejedje buohkat bures. Nuoramusaid luohkás leat buohkat vuoitit.
– AK-54 Várggáid David Øvrevalle searvvai iežas vuosttaš heaibungilvui ja lei movttet go oaččui pokála ja diploma buori barggu ovddas.
Duhtavaččat
BK Tana leat hui duhtavaččat dán jagá TanaMatchain. Birrasii 75 heaibu bohte Ruoššas Detnui heaibut.
– Ruoššaid haga livččii gilvu šaddan eambbo láittasin ja norgalaččain livčče unnit gilvvut.
