-Almmuhus-
OAIVILATGivssi­deapmi Guovda­geainnu skuvllas 

Givssi­deapmi Guovda­geainnu skuvllas 

-

-

Mun lean dál 81 jagi boaris ja lean ollu vásihan iežan eallinagistan. Ja dál go oidnen min čeahpes sátnejođiheaddji, Hans Isak Olsena,  čilgeme Ávvirii movt lea mánáid givssidanáššiiguin Guovdageainnu skuvllas odne, de dat bovttii mu jurddašeami. Dasa ii leat goasse gávdnon buorre čoavddus.

Mun álgen skuvlii 1948/49 ja gergen 1956. Ja dan áigodagas lei maid givssideapmi skuvllas unnit eanet. Munnos leat 9 máná ja sii leat maid vázzán skuvlla Guovdageainnus ja givssideapmi lea čađat leamašan, sihke almmus givssideapmi ja čiegus givssideapmi.  Ja dál leat mus mánáidmánát juo guhká vázzán skuvlla Guovdageainnus ja givssideami dáfus ii leat skuvllas rievdan mihkkege. Dál mus leat máttarmánát maid álgán seamma skuvlii ja givssideapmi lea ain bistiime, ii leat nohkan ii veahášge Guovdageainnu skuvllas.  Iige leat vel gávdnon makkárge čoavddus mii givssideami lea sáhttán eastadit ja bissehit.

Dat lea oba imaš mu ipmárdusa mielde.  Vai lea go nu hušša áigi váhnemiin ahte eai máhte, iige leat áigi oahpahit iežaset mánáide albma olmmošvieru dan oahpu mielde maid min buolvva olbmot leat beassan oahppat mánnávuođas juo, Ipmil sáni oahppu. Mun gal doaivvun dat lea stuora váilivuohta otná skuvllas ja ruovttuin maid.  Muhto dat lea goit váhnemiid geatnegasvuohta ja ovddasvástádus oahpahit mánáide dábálaš olmmošvieru ja čuovvut mielde mo su mánná láhtte skuvllas ja servodagas. Dat leat duohta dárbbašlaš áššit. 

Dál lea áigi váldit duođas dákkár duođalaš dili ja duođas bargagoahtit ahte eastadit dákkár fasttes vieru, ja ohcat ja gávdnat manne min skuvllas lea ná.  Na ii goit galggaše oktage vigihis mánná dárbbašit gillát fuollameahttunvuođa, olggušteami ja givssideami.  Ja vel dakkár báikkis gos oahppanolbmot leat barggus juohke beaivvi, olles skuvlajagi. 

Dákkár dilálašvuođas ferte buorre gulahallan olles skuvlla hálddahusas, váhnemiiguin ja buohkaiguin geain lea mánáiguin dahkamuš.

Dát áššit gullet politihkkariidda maid.  Ja olles riika stivrejupmái. Dat eai leat unna áššážat go mii duođas jurddašit, rievtti mielde galggaše olbmot geat dákkár dilálašvuođa čuvvot mielde. 

Ná jurddašan mun ja sávan ahte dat fasttes vierut eai galggaše beassat čuovvut mielde ođđa skuvlavisttiide maid dál leat hukseme Guovdageidnui.

Sávan ráfálaš ja buressivdniduvvon ođđajagi buohkaide.

Elle Márjá Turi Gaup, Ellen Marie Turi Gaup
Elle Márjá Turi Gaup, Ellen Marie Turi Gaup
-Almmuhus-