Cizážat vizardišgohtet, beaivváš liggegoahtá ja beassážat leat sihkkaris mearkkat ahte geassi lahkonišgoahtá. Lea áigi muittuhit ahte sotnabeaivvi, vuosttaš beassášbeaivvi, njukčamánu 31. beaivvi, lea áigi bonjastit tiibmoviisáriid tiimmu ovddasguvlui.
Man guvlui de galgá bonjastit viisáriid vai čájehišgoahtá geasseáiggi? Maŋimuš beaivvi njukčamánus bonjastat tiibmoviisáriid ovddosguvlui geasi vuostá, tiibmu 02.00 gitta 03.00, ja dalle massát ovtta tiimmu beassášbasiin. Dás rájes čuvggodit beaivvit. Muhtin tiimmuid, nu go analoga giehtatiimmu, uvnna tiimmu, fertet ieš divustit tiibmoviisáriid tiimmu ovddosguvlui, muhto digitála tiibmu divvojuvvo neahtta bokte, dieđiha Justervesenet preassadieđáhusas.
Gii digitála tiimmuid divusta? Justervesenet bargu ii leat divustit tiimmuid ovtta tiimmu geasi guvlui, muhto das lea ovdasvástádus Norgga almmolaš áiggis. Bargui gullá heivehit atomatiimmuid laboratorias, dutkat áiggi ja bargat máilmmi oktasaš áiggi vuogádaga buorrin, UTC.
Jus ii Justervesenet heivet áiggi, mo sáhttet PC-dihtor, neahttabreahtta dahje mobiilagiehtatelefuvdna diehtit mii lea rivttes áigi. Dien oasi fuolaha dihtora operatiivavuogádat. PC:s ja giehtatelefuvnnain lea sierra tiibmu mii coahkká beroškeahttá lea go neahtas vai ii, muhto ferte oažžut neahta bokte dieđu vázzá go riekta.
Eanaš operatiivavuogádagat vižžet áiggi áigebálvalusain mat geavahit Network Time Protocol (NTP). Justervesenet lea rabas áigebálvaleaddji mii addá UTC-áiggi neahta bokte dihtoriidda. Dat NTP-bálvaleaddji vástida 300 jearaldaga sekunddas, mii lea birrasii 20-25 miljovnna vástideami jándorii.
Maid galggan bargat? Áidna maid dárbbašat bargat lea bonjastit tiibmoviisára tiimmu ovddosguvlui sotnabeaivvi ja návddašit beassášbasiid. Eambbo dieđu Norgga áiggi ja Justervesenet birra, geahčas www.justervesenet.no.
