-Almmuhus-
OĐĐASATGáivuona suohkanis alla givssidan­logut

Gáivuona suohkanis alla givssidan­logut

-

-

Gáivuona suohkan lea okta dain vearrámus suohkaniin Norggas givssideami ektui. Sátnejođiheaddji ii leat duhtavaš ja lohká givssideami dohkketmeahttumin. 

Unnit ja unnit 10. luohkká oahppit dovdet sii vásihit givssideami skuvllas, muhto aŋkke leat muhtin suohkaniin alla logut. 

Ohppiidiskkadeapmi čađahuvvo Norggas juohke jagi. Iskkadeamis besset oahppit muitalit maid sii oaivvildit skuvladili birra. Earret eará ožžot oahppit jearaldaga givssideami birra skuvllas. Givssiduvvo go eará ohppiin, givssiduvvo go digitálalaččat vai givssiduvvo go rávisolbmuin skuvllas eambbo go guovtte háve manus?

Skuvlajagi 2018/2019 ledje 9,1 proseantta ohppiin Finnmárkku skuvllain vástidan ahte dovdet givssideami skuvllas, skuvlajagi 2019/2020 čajehuvvo ahte logut lea njiedjan 2,2 proseanttain. 

Ohppiidiskkadeami logut čájehit maid ahte Romssa skuvllain lea givssideapmi lassánan maŋemus jagiid, skuvlajagi 2018/2019 ledje 8,5 proseantta ohppiin Romssa skuvllain vástidan ahte dovde iežaset givssiduvvon, skuvlajagi 2019/2020 vástidedje 9 proseantta ohppiin ahte leat dovdan iežaset givssiduvvon. 

Gáivuona suohkan vearrámus

38,9 proseantta ohppiin dovdet iežaset givssiduvvon Gáivuona suohkanis. 

– Givssideapmi ii leat dohkálaš, ja mis ii galgga leat givssideapmi skuvllain. Mii leat bargan eastadit givssideami daid maŋemus mánuid, ja mii leat ain bargame. Mun in leat duhtavaš daiguin loguiguin, ja leat hui suorggahahtti, muitala Gáivuona suohkana sátnejođiheaddji Bernt Eirik Isaksen Lyngstad. 

Nordlánddas leat logut vuollin, muhto Hábmera suohkanis leat maid alla logut givssideami ektui, doppe leat 28,6 proseantta ohppiin vástidan ahte leat vásihan givssideami. 

– Mus ii leat kommentára diesa go in leat vel oaidnán iskkadeami loguid, dadjá Hábmera suohkana bajásšaddan- ja oahpahushoavda Gunnar Solstrøm. 

Álttá nuoraidskuvla

Álttá nuoraidskuvllas leat juohke skuvlajagi njiedjan logut, skuvlajagi 2016/2017 ledje 16,7 proseantta ohppiin vástidan ahte dovde givssiduvvon, ja dal leat lohkku 7,6 proseantta. 

Ávvir lea humadan Álttá nuoraidskuvlla rektoriin Magne Medlien, son lea duhtavaš loguiguin.

– Logut leat šaddan mearkkašahtti buorebun. Mii leat systemáhtalaččat bargan oahpaheddjiiguin skuvllas ja min oahppit láhttejit čábbát nubbi nuppiin. Daid maŋemuš jagiid leat mis leamaš 2 birasbargi min skuvllas, soai leaba aktiivvalaččaid bargan ohppiiguin ja skuvlabirrasiin, muitala Álttá nuoraidskuvlla rektor Magne Medlie. 

Medlie muitala maid ahte sis lea mihttun oažžut logu áibbas vulos, ja áigot ain viidáseappot bargat ollašuhttit dan.

Kárášjoga ja Guovdageainnu skuvllaid  logut eai leat vel almmuhuvvon. 

-Almmuhus-