Dál, go lea vuddjon badjel bealli Finnmarksløpet-1200:s, de lea Dallas Seavey, gii lei okta ovdagihtii oiddohiin, šaddan vuollánit.
Dál, go lea vuddjon badjel bealli Finnmarksløpet-1200:s, de lea Dallas Seavey, gii lei okta ovdagihtii oiddohiin, šaddan vuollánit.
Dallas Seavey vujii diibmá maid Finnmarksløpet.
Seavey lea ovdal vuoitán guokte dan golmma guhkimus beanavuodjimiin ja lea ge dál bivdime iežas vuosttaš vuoittu Finnmárkkus.
Seavey vuittii Iditarod beanavuodjima vuosttaš geardde 2012:s ja lea maŋŋel vel vuoitán gilvvuid golmma geardde.
Son lea maid vuoitán Yukon Quest gilvvu (2011:s), mii lea okta dan golmma guhkimus beanagilvvus.
Leat dušše njeallje beanavuoddji geat leat vuoitán sihke Yukon Quest ja Iditarod. Ii okta ge leat vuoitán buot dan golbma guhkimus gilvvu.
– Diehttelas lea váivi vuollánit. Mus livčče gal hirbmat buorit beatnagat, muhto dat eai leat iežaset ládje dál ja dat gal lea šállošahtti. Beatnagat lihkus eai dieđe ahte sii leat johtán máilmmeláhki birra gilvvohallat, ja mis gal lea leamaš fiinnis vaikko boađus ii šaddan nu go leimmet sávvan, dajai Seavey NRK Finnmárkui.
Gelddolaš loahpaheapmi
Ovcci FL-1200 vuddjiin leat bisánan go ovddemus vuddjiin lea báhcán vel birrasii 220 kilomehtera.
Diimmá vuoiti, Petter Karlsson, ja son gii nubbin bođii, Birgitte Næss, leaba dán jagi ge njunnošis doarrume.
Dasa lassin leat vel Thomas Wærner, John Erik Eriksen ja Kristian Walseth dan viđa ovddemusa searvvis.
Duorastaga vudje vuosttažat Kárášjohkii gos lea maŋemus bággovuoiŋŋasteapmi.
Doppe ja Leavvajogas galget vuodjit bisánit unnimus logi diimmu oktiibuot, ovdal go gilvu buollá Kárášjogas Áltái.
Vuddjiin lea vel báhcán sullii 132 kilomehtera vuodjit ovdal go ollejit mollii.
