Distaga 26. beaivvi leat duodjemárkanat, boares niiberávddis, dahje Bájis nu go dan gohčodit dál Kárášjogas.
– Mii háliidit duodjemárkaniid fállat sidjiide geat bohtet Kárášjohkii ja geat eai beasa daidda márkaniidda mat dáppe leat muđui jagis. Beassážiid han lávejedje dolin olu duodjemárkanat ja dál eai leat leamaš guhkes áigái, muitala lágideaddji ja Samipath fitnodaga jođiheaddji Ammon Piera Nystad.
Son muitala sis lea sadji lagabui 30 vuovdái dahje duojárii, ja buot sajit leat dievvan.
– Mii vuohttit hui stuora beroštumi duodjemárkaniidda. Doppe lea maid kafea ja eará hommát mánáide ja nie, muitala Nystad.
