Dan vahkkoloahpa ledje ollu dáhpáhusat maid Finnmárkku politiijat šadde čoavdit. Dás oainnát mannan ija dáhpáhusaid.
Dan vahkkoloahpa ledje ollu dáhpáhusat maid Finnmárkku politiijat šadde čoavdit. Dás oainnát mannan ija dáhpáhusaid.
Okta dáhpáhusain lei go guokte dievddu doarráiga Hámmárfeasta gávpotguovddážis sotnabeaivvi čuovganeapmái diibmu 4s. Sivvan doarrumii lei go goappašagain lei miella váldit ovtta nieidda mielde ruoktot. Politiijat šadde sirret dievdduid ja sihtat sudno mannat ruoktot. Politiijat eai dieđe vulggii go nisu goappáge mielde ruoktot, muitalit sii Twitteris.
Gárrendilis vuodjin
Bearralvágis leat politiijat váldán gitta muhtin dievddu go galgá vuodján gárrenoaivvis. Son lei vuodján badjel luotta ja gopmánan biillain. Politiijat muitalit ahte sii váldet sus varraiskosiid. Dán čállet sii Twitteris sotnabeaivvi iđit.
Ollu olbmot biillas
Diibmu guđas iđđes, ledje politiijat iskame johtolaga Bossogobis Álttás. Ledje 12 biilla maid iske. Okta oaččui sáhku go lei čoaggán badjelmeare ollu olbmuid biilii.
Heajos láhtten
Čáhcesullos lei muhtin dievdu gii lei gárrenoaivvis bivdalan riidduid diibmu beal golmmas mannan ija. Politiijat gohččo dievddu guođđit gávpotguovddáža heajos láhttema dihte.
Idjačiekčamat
Muhtimat ledje viimmáskan spáppa čiekčagoahtit ihkku, kvártta váile guovttis, Čáhcesullos. Politiijat gohččo spábbačikčiid vuordit čiekčamiiguin gasku beaivái dahje maŋŋelgaskabeaivái.
Gielistii iežas agi
Hámmárfeasttas lei muhtin 17 jahkásaš nieida rievdadan identifikašuvdna duođaštusa vai beassá olgobáikkiide sisa. Politiijat gohččojuvvo beal guovttis báikái ja ásahit ášši dáhpáhusas.
Suoládeigga
Guoktása leigga suoládan ovtta olgobáikkis Girkonjárggas, ja biddjuiga giddagassii. Soai leigga gárihuvvan ja vikkaiga dahkat stuimmi, muitalit politiijat Twitteris.
Politiijat Cuokcavutnii
Lávvordateahkeda dieđihedje olbmot politiijaide muhtin dievddu birra gii skoalkkuhii lásiide Cuokcavuonas, Láhpis. Politiijat eai vuolgán báikái. Maŋŋelaš geahččaledje politiijat aŋkke gávdnát muhtimiid geat sáhtte fitnat Cuokcavuonas. Politiijat giitet maid buollinčáskadeddjiid veahki ovddas.
Politiija ja dearvvašvuođabargit fitne Láhpis, gos sii vižže ovtta gárihuvvan olbmo ja bidje su giddagassii Álttás go lei rigeren fasttit.
Luovos heastat
Veaiggosvuonas Fálá suohkanis ledje heastat luovos, ja politiijat áigu gávdnát eaiggáda.
Leavnnjas lei maid heastta bijadan luoddaráigge Bissojoga guvlui. Heasta mas dielkkut lei oidnon sullii kilomehtera eret Leavnnjas. Politiijat bivde olbmuin cavgilemiid jus oidnet dan heasta.
